Bu il dünyada milyarderlərin sayı keçən ilə nisbətən 141 nəfər artaraq rekord səviyyəyə - 2781 nəfərə çatıb.

İqtisadiyyat.az xəbər verir ki, bu barədə Amerikanın biznes jurnalı “Forbes”in bu il 38-ci dəfə dərc etdiyi “Milyarderlər siyahısı” dünyada milyarderlərin sayının və sərvətlərinin artdığını göstərib.

Hesabata görə, dünyada milyaderlərin ümumi sərvəti 2 trilyon dollar artaraq 14,2 trilyon dollara çatıb.

Lüks geyim brendi "LVMH"nin baş direktoru Bernard Arnon 233 milyard dollarlıq sərvəti ilə ikinci dəfə dünyanın ən varlı adamı seçilib. Onun sərvəti keçən illə müqayisədə 22 milyard dollar artıb.

Siyahıda "Tesla" və "SpaceX"in baş direktoru İlon Mask 195 milyard dollarlıq sərvətlə ikinci, "Amazon"un qurucusu Ceff Bezos isə 194 milyard dollarlıq sərvətlə üçüncü olub. Ötən il olduğu kimi milyarderlərin təxminən 13 faizini qadınlar təşkil edib. Dünyanın ən varlı qadını 99,5 milyard dollarlıq sərvəti ilə "L'Oréal"ın qurucusunun nəvəsi  Fransua Bettenkur-Mayersdir.

Milyarderlərin orta yaşı 66 olduğu halda, ən yaşlı milyarder 102 yaşındadır. Ən zəngin insanlar arasında 25 milyarderin yaşının 33 və daha kiçik olduğu bildirilib. Bu insanların ümumi sərvəti 110 milyard dollar olaraq hesablanıb.

Ən çox milyarderin olduğu ölkə 813 nəfərlə ABŞ olub. Bu ölkəni 473 milyarderlə Çin və 200 milyarderlə Hindistan izləyib. Bu il Türkiyədən 27 ad bu siyahıya daxil edilib.

Gözəl Həşimova