Dünya təbiətin məhvinə və qlobal istiləşməyə kömək edən subsidiyalara ildə ən azı 2,6 trilyon dollar xərcləyir.

İqtisadiyyat.az xəbər verir ki, bu barədə Böyük Britaniyanın "The Guardian" qəzetinin yeni təhlilində deyilir.

Araşdırmaya əsasən, ölkələr 2015-ci il Paris İqlim Sazişinin məqsədlərinə birbaşa zidd olan vergi güzəştləri, subsidiyalar və digər xərclərə milyardlarla dollar ayırmağa davam edir.

Eyni zamanda, ölkələr meşələrin qırılması, suyun çirklənməsi və qalıq yanacaqların çıxarılması ilə bağlı tədbirləri birbaşa dəstəkləyirlər.

Hesabatda ətraf mühitə ziyan vuran illik subsidiyaların 800 milyard dollardan çox artdığı da müəyyən edilib. Bu artım Ukraynadakı müharibə ilə bağlı olub və bu, qalıq yanacaqlara subsidiyaların kəskin artmasına səbəb olub.

Hesabatın müəllifləri bildirirlər ki, qlobal ÜDM-in təxminən 2,5%-nə bərabər olan 2,6 trilyon dolların böyük hissəsi insanlara və təbiətə fayda verən siyasətlər üçün istifadə oluna bilər.

 

Gözəl Həşimova