İqtisadiyyat.az xəbər verir ki, “Moody’s beynəlxalq reytinq agentliyinin yayımladığı son hesabatda bu riskin 2,5 faizdən 3,1 faizə yüksəldiyi bildirilir.

Mütəxəssislər bu rəqəmin müəyyən hallarda 6 faizə qədər çıxa biləcəyini də istisna etmirlər.

“Moody’s”in analitiklərinin fikrincə, belə bir vəziyyətin yaranması üçün qlobal bazarlarda dərin böhran və ya kəskin şok belə lazım deyil. ABŞ-nin tətbiq edə biləcəyi yeni ticarət tarifləri və bu istiqamətdəki qeyri-müəyyənliklər artıq öz təsirini göstərməkdədir. Əgər rüsum siyasəti daha da sərtləşərsə, həm ABŞ, həm də qlobal iqtisadi inkişaf zəifləyə, investorlar daha ehtiyatlı davranmağa başlaya bilər.

İlin ilk üç ayında 27 şirkət defolt elan edib. Müqayisə üçün qeyd edək ki, ötən ilin eyni dövründə bu göstərici 38 idi. Defolt hallarının böyük əksəriyyəti səhiyyə, biznes xidmətləri, pərakəndə satış, mehmanxana-istirahət və telekommunikasiya sahələrində baş verib.

Bundan əvvəl “Moody’s”in baş iqtisadçısı Mark Zandi ABŞ prezidenti Donald Trampın dövründə tətbiq edilən ticarət tariflərinin və buna qarşı verilən cavab tədbirlərinin qlobal maliyyə bazarlarında ciddi dalğalanmalara səbəb ola biləcəyini vurğulamışdı.

Bu proqnozlar göstərir ki, qlobal iqtisadi sistem pandemiya sonrası sabitliyə tam qayıda bilməyib. İnflyasiya, faiz dərəcələrinin artımı, geosiyasi risklər və proteksionist iqtisadi siyasətlər defolt riskini artıran əsas amillərdir. Ticarət siyasətindəki qeyri-müəyyənliklər isə şirkətlərin gəlirliliyinə və likvidliyinə birbaşa təsir göstərir. Məlum olur ki, sadəcə makroiqtisadi göstəricilərə deyil, həm də siyasi qərarlara qarşı da daha həssas dövrə daxil olmuşuq. Gözlənilməz bir ssenari reallaşarsa, bu, defoltların ikinci bir dalğasını doğura bilər.