Çin güclü yağışlar səbəbindən ölkə daxilində məhsul qıtlığı fonunda dünya bazarından kütləvi şəkildə buğda almağa başlayıb.
Bu barədə İqtisadiyyat.az "Bloomberg"ə istinadən xəbər verir.
Məlumata görə, Çinin artan tələbi səbəbindən dünya buğda qıtlığı ilə üzləşə bilər. Belə ki, indiyə qədər ölkə Avstraliyanın demək olar ki, bütün mövcud ixrac ehtiyatlarını satın alıb. Çin indi ABŞ, Fransa və Kanada da daxil olmaqla, digər əsas istehsalçılardan kütləvi şəkildə yüksək keyfiyyətli buğda almaq üçün imkanlar axtarır.
Bir çox ölkələrdə məhsul çatışmazlığı səbəbindən ehtiyatların azaldığı nəzərə alınsa, qlobal bazar buğda tədarükü çatışmazlığı ilə üzləşə bilər.
Qeyd edək ki, Azərbaycana bu ilin yanvar-avqust aylarında 183,5 milyon ABŞ dolları dəyərində 668,3 min ton buğda idxal edilib.
Gözəl Həşimova
