Birləşmiş Ərəb Əmirliyinin ən məşhur turistik yerlərindən və ticarət mərkəzlərindən biri olan "The Dubai Mall" genişlənməyə hazırlaşır.

İqtisadiyyat.az xəbər verir ki, bu barədə ticarət mərkəzini idarə edən "Emaar" məlumat yayıb.

Məlumata görə, 408,4 milyon dollara təmir olunacaq "Dubai Mall"da daha 240 yeni dəbdəbəli mağaza, eləcə də ərzaq mağazaları olacaq.

Qeyd edək ki, ötən il "The Dubai Mall" dünyanın ən çox ziyarət edilən məkanı olub. "Mall" 105 milyon ziyarətçi ilə yeni rekorda imza atıb. Bu göstərici 2022-ci illə müqayisədə isə 19% artıb.

Dünyanın ikinci ən böyük ticarət mərkəzi olan "Dubai Mall" 1,2 milyon kvadratmetr ərazini əhatə edir və 1200-dən çox pərakəndə satış nöqtəsinə malikdir.

 

Gözəl Həşimova