Beyləqan Rayon Mərkəzi Xəstəxanasında pozuntu aşkarlanıb.

İqtisadiyyat.az xəbər verir ki, tibb müəssisəsi barəsində İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti tərəfindən İnzibati Xətalar Məcəlləsinin 538.1-ci maddəsinə əsasən cərimə protokolu tərtib edilib.

Daha sonra protokol baxılması üçün rayon məhkəməsinə göndərilib.

Məhkəmə işi hakim Ramiz Nurullayevin sədrliyi ilə araşdırılacaq. Əgər hakim Dövlət Xidmətinin iddiasını təmin edərsə, xəstəxana 4000 manatadək cərimə olunacaq.

Tibb müəssisəsinin barəsində protokol tərtib olunduğu maddədə deyilir ki, ölçmələrin vəhdətinin təmin edilməsinin dövlət tənzimlənməsinə aid olan sahədə ölçmələrin tipi təsdiq edilməmiş və (və ya) yoxlamadan keçirilməmiş ölçmə vasitələrindən istifadə edilməklə aparılmasına və (və ya) ölçmələrin attestasiya edilməmiş ölçmə metodikaları (metodları) ilə yerinə yetirilməsinə görə vəzifəli şəxslər min beş yüz manatdan iki min manatadək məbləğdə, hüquqi şəxslər üç min manatdan dörd min manatadək məbləğdə cərimə edilir.