Kənd təsərrüfatı şirkəti olan "Aqrofruit" MMC-yə istehlakçıların hüquqlarının pozulması ilə bağlı qanunvericiliyin tələbini pozduğu üçün cərimə yazılıb.

İqtisadiyyat.az xəbər verir ki, şirkət barəsində İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti tərəfində İnzibati Xətalar Məcəlləsinin 447.0.4-cü maddəsinə əsasən cərimə protokolu tərtib edilib.

Daha sonra protokol baxılması üçün Qaradağ Rayon Məhkəməsinə göndərilib. İş hakim Rufan Mürsəlovun sədrliyi ilə araşdırılacaq.

 "Aqrofruit"in barəsində protokol tərtib olunduğu maddədə deyilir ki, qanunvericiliyə əsasən məcburi sertifikatlaşdırılmalı olan, lakin sertifikatlaşdırılmamış malların istehsalına, satılmasına, işlərin yerinə yetirilməsinə, xidmətlərin göstərilməsinə fiziki şəxslər üç yüz əlli manatdan beş yüz manatadək məbləğdə, vəzifəli şəxslər min beş yüz manatdan iki min manatadək məbləğdə, hüquqi şəxslər dörd min manatdan altı min manatadək məbləğdə cərimə edilir.

Qeyd edək ki, "Aqrofruit" MMC meyvə məhsullarının istehsalı və satışı ilə məşğuldur. Şirkətin hazırda 147 112 manat vergi borcu da yığılıb.