Dövlət Gömrük Komitəsi "Avromed" şirkətinə cərimə protokolu yazıb.

İqtisadiyyat.az xəbər verir ki, protokol İnzibati Xətalar Məcəlləsinin 485.2-ci maddəsinə əsasən tərtib olunub.

Sənəddə deyilir ki, Gömrük Məcəlləsi ilə müəyyən edilmiş hallarda qısa idxal bəyannaməsinin mallar gömrük ərazisinə gətirilməzdən əvvəl elektron formada verilməməsinə görə vəzifəli şəxslər min manat məbləğində, hüquqi şəxslər min beş yüz manat məbləğində cərimə edilir.

Daha sonra protokol baxılması üçün Nəsimi Rayon Məhkəməsinə göndərilib.

Məsələ hakim Elməddin Hüseynovun icraatına verilib.

Hakim DGK-nin protokolunu təsdiqləyərsə, "Avromed" cərimə olunacaq.

Qeyd edək ki, əczaçılıq fəaliyyəti göstərən "Avromed Company" QSC 2002-ci ildə yaradılıb. 2003–2010-cu illərdə "Avromed"ə hazırda Milli Məclisin deputatı olan Cavanşir Feyziyev rəhbərlik edib. Buna baxmayaraq, mediada gedən məlumatlara görə, şirkətin sahibi hələ də Cavanşir Feyziyevdir.