Dövlət Gömrük Komitəsi (DGK) "Veysəloğlu" şirkəti barəsində cərimə protokolu tərtib edib.

İqtisadiyyat.az xəbər verir ki, buna səbəb isə şirkətin mallar və nəqliyyat vasitələri gətirilərkən və ya aparılarkən müvafiq icra hakimiyyəti orqanına məlumatın verilməməsi və ya təhrif olunmuş məlumatın verilməsi, yaxud əvvəlcədən qısa idxal bəyannaməsinin verilməməsi ilə bağlı qanunvericiliyin tələbini pozmasıdır.

Belə ki, DGK "Veysəloğlu" şirkətinə İnzibati Xətalar Məcəlləsinin (İXM) 485.2-ci maddəsinə əsasən cərimə yazıb.

Daha sonra protokol baxılması üçün Nizami Rayon Məhkəməsinə göndərilib. Məhkəmə işi hakim Nəriman Mehdiyevin sədrliyi ilə araşdırılacaq.

Qeyd edək ki, İXM-nin 485.2-ci maddəsinə əsasən Gömrük Məcəlləsi ilə müəyyən edilmiş hallarda qısa idxal bəyannaməsinin mallar gömrük ərazisinə gətirilməzdən əvvəl elektron formada verilməməsinə görə vəzifəli şəxslər min manat məbləğində, hüquqi şəxslər min beş yüz manat məbləğində cərimə edilir.

Xatırladaq ki, 1994-cü ildən topdan satış mərkəzi kimi fəaliyyətə başlamış “Veysəloğlu” satış, distribüter və istehsal şirkətidir. 2001-ci ildən etibarən şokolad və karamel istehsalına başlayıb. Şirkətlər Qrupuna “Ulduz” şokolad fabriki də daxildir.