Bir çoxları dişlərini fırçalamağa başlayarkən, fırçanın ağız hissəsinə pasta əlavə etməzdən əvvəl onu isladır. Lakin bunu doğru hesab etməyənlər var. İqtisadiyyat.az xarici mediaya istinadən xəbər verir ki, Londondakı “Marylebone Smile” klinikasının stomatoloqu Dr. Sahil Patel bu mövzuda britaniyalıları xəbərdar edib. Onun sözlərinə görə, fırçanı islatmaq diş məcununun təsirini azaldır: "Diş pastasının tərkibində lazımi miqdarda sululuq var. Fırça isladıldıqda sululuq səviyyəsi artır, pasta ağızda daha tez köpüklənir və insan onu daha tez tüpürməyə məcbur olur”. 

Həkimin digər iradı fırçanı çox sərt tutmaqla bağlıdır: “İnsanlar fırçanı tutarkən əlləri sanki yumruğa çevrilir. Halbuki buna ehtiyac yoxdur. Fırçanın telləri dişlərin üzərində çox əyilirsə, deməli öz işini düzgün görmür. Tellər diş üzərində düz qalmalı və mümkün qədər yumşaq toxunuşla öz işini görməlidir”. 

S.Patelin diqqət çəkdiyi digər məqam dişlərin yuyulması zamanı prosesə arxa dişlərdən başlamağın daha faydalı olduğu ilə bağlıdır: “Adətən arxa dişlər təmizlənməsi daha çətin olan hissə olduğu üçün, təmizliyə məhz arxadan başlayıb önə doğru gəlmək daha məqsədəuyğun hesab olunur. Prosesə öndən başlayanda bəzən insanlar səbrsiz davranıb arxa hissələri ötəri təmizləmiş olur”.

Həkim insanların dişlərini gündə iki dəfə tələsik fırçalamaqdansa, bir dəfə amma çox ciddi və dərindən təmizləməsini daha doğru hesab etdiyini də ayrıca vurğulayıb.