Dövlət Gömrük Komitəsi (DGK) türk inşaat şirkəti olan "Zetas AGT"yə cərimə yazıb.

İqtisadiyyat.az xəbər verir ki, cərimə protokolu İnzibati Xətalar Məcəlləsinin 499.2-ci maddəsinə əsasən tərtib edilib.

Daha sonra protokol baxılması üçün Nərimanov Rayon Məhkəməsinə göndərilib və iş hakim Gültəkin Əsədovanın icraatına verilib.

Tikinti şirkətinin barəsində cərimə protokolu tərtib olunan maddədə deyilir ki, aparılması və ya qaytarılması məcburi olan əvvəllər gətirilmiş və ya aparılmış mallar və nəqliyyat vasitələrinin Azərbaycan Respublikasının gömrük ərazisindən kənara aparılmamasına və ya bu əraziyə qaytarılmamasına görə inzibati xətanın bilavasitə obyekti olan mallar və ya nəqliyyat vasitələri müsadirə edilir, yaxud vətəndaşlar həmin malların və ya nəqliyyat vasitələrinin dəyərinin yetmiş faizindən yüz faizinədək məbləğdə cərimə edilir, əcnəbilər və vətəndaşlığı olmayan şəxslər həmin malların və ya nəqliyyat vasitələrinin dəyərinin yetmiş faizindən yüz faizinədək məbləğdə cərimə edilir və ya Azərbaycan Respublikasının hüdudlarından kənara inzibati qaydada çıxarılır.

Qeyd edək ki, Türkiyəyə məxsus "Zetas AGT" MMC 2009-cu ildə dövlət qeydiyyatına alınıb. Şirkətin qanuni təmsilçisi Murat Aydındır. O, "Zetas AGT" MMC-nin daxil olduğu "Zetas" şirkətinin Satınalma və logistika meneceridir.