47 saylı Sumqayıt–Abşeron–Qaradağ seçki dairəsindən deputatlığa namizədliyi qeydə alınmış Zaur Ramiz oğlu Şükürovun seçkiqabağı təbliğat–təşviqat kampaniyası çərçivəsində Abşeron rayonunun Qobustan kənd tam orta məktəbinin akt zalında seçicilərlə 16 avqust tarixində 7-ci görüşü keçirilib.
Görüşünün əvvəlində torpaqlarımızın işğaldan azad edilməsi uğrunda şəhid olan qəhrəman oğullarımızın əziz xatirəsi bir dəqiqəlik sükutla yad edilib.
Sonra çıxış edən deputatlığa namizəd Zaur Şükürov tədbir iştirakçılarına özünün diplomatik sahədə fəaliyyəti dövründə dövlətimizin maraqlarının qoruması istiqamətində atdığı addımlardan bəhs edərək, seçiləcəyi təqdirdə bu illər ərzində əldə etdiyi təcrübədən istifadə edərək seçicilərini qalib Azərbaycanımızın Milli Məclisində də layiqincə təmsil edəcəyini, parlament diplomatiyası çərçivəsində fəaliyyətə töhfə verəcəyini bildirib.
Daha sonra, platforması barədə seçicilərini məlumatlandıran Z.Şükürov nəzərdə tutduğu planların həyata keçirilməsi üçün aidiyyəti qurumlarla əlaqələndirilmiş şəkildə lazımi səylər göstərəcəyini, seçicilərin qaldıracağı məsələləri diqqətdə saxlamaq üçün onlarla vaxtaşırı görüşlər keçirəcəyini vurğulayıb.
Sonda seçicilərlə fərdi söhbət edən Z.Şükürov onları maraqlandıran suallara aydınlıq gətirmiş və görüşlərini davam etdirəcəyini bildirmişdir.
Seçicilər öz növbəsində maraqlı görüşə görə məmnunluğunu ifadə edərək, onları təmsil edəcək millət vəkilinin mütəmadi görüşlər keçirəcəyinə və qaldırdıqları məsələlərin diqqətdə saxlanacağına ümidvar olduqlarını diqqətə çatdırıblar.