Bu sözləri İqtisadiyyat.az-a açıqlamasında Milli Məclisin deputatı Vasif Qafarov bildirib.
Onun sözlərinə görə, Şuşa Bəyannaməsi sarsılmaz müttəfiqliyin rəsmi sənədləşməsi olmaqla yanaşı, regionda və beynəlxalq müstəvidə ciddi siyasi və geosiyasi mesaj daşıyır. Müqavilə Azərbaycanın və Türkiyənin regional təhlükəsizliyə, inteqrasiyaya və sabitliyə töhfə vermək niyyətini əks etdirir:
Eyni zamanda, Bəyannamə Ermənistandakı revanşist qüvvələrə mühüm ismarışdır. Şuşa Bəyannaməsi ilə Türkiyə açıq şəkildə Azərbaycanın ərazi bütövlüyünün pozulması, dövlət sərhədlərinə təhdid kimi halların baş verməsi halında, ordu ilə ölkəmizin yanında yer alacağını beynəlxalq ictimaiyyətin diqqətinə çatdırır.
Bəyannamə təkcə siyasi deyil, iqtisadiyyat, enerji, müdafiə sənayesi, nəqliyyat, təhsil, mədəniyyət və informasiya sahələrində də dərin əməkdaşlıq platforması yaradır. Bu sənədin icrası nəticəsində müdafiə və təhlükəsizlik sahəsində ortaq layihələr və hərbi təlimlər genişləndirilib, Qarabağın bərpasında Türkiyə şirkətləri ilə sıx əməkdaşlıq həyata keçirilir, qarşılıqlı investisiya mühiti daha da əlverişli hala gətirilir, diaspor və media sahəsində koordinasiyalı fəaliyyət gücləndirilir".
Deputat əlavə edib ki, Şuşa Bəyannaməsində 100 il öncə imzalanmış Qars müqaviləsinə istinad edilməsi, sənədə dərin tarixi və rəmzi məna qazandırır:
"Tarixən böyük güclərin maraq dairəsində olmuş Cənubi Qafqazda bu gün Azərbaycan və Türkiyənin birgə siyasi iradəsi və əməkdaşlığı regional güc balansını dəyişməkdədir. Müasir dövrdə bu sənəd Türk Dövlətləri Təşkilatı kimi platformalarda da yeni strateji istiqamətlərin formalaşmasına təkan verir.
Şuşa Bəyannaməsi Azərbaycanın və Türkiyənin strateji müttəfiqliyinin hüquqi təminatıdır. Bu sənəd yalnız bugünkü əməkdaşlığın deyil, gələcək nəsillərə ötürüləcək birgə siyasi iradənin və ortaq gələcəyin yol xəritəsidir. Bu sənədin imzalanması ilə Azərbaycanın və Türkiyənin əlaqələri sadəcə qardaşlıqla deyil, müttəfiqlik statusu ilə də möhkəmləndirildi".
