“Biz müstəqilliyimizin 33-cü ildönümünü böyük qürur hissi ilə qeyd edirik”.
Bu sözləri İqtisadiyyat.az-a açıqlamasında Milli Məclisin deputatı Elman Nəsirov deyib.
O bildirib ki, Müstəqilliyin Bərpası Günü Azərbaycan xalqının ən əziz bayramlarındandır: “Prezident İlham Əliyevin dediyi kimi, müstəqillik bizim ən böyük sərvətimiz və ən böyük dəyərimizdir. 1918-ci ilin 28 May tarixində müstəqil Azərbaycan Xalq Cümhuriyyətini yaradan qurucu ataların ruhu bu gün şaddır. Müasir Azərbaycan dövlətçiliyinin banisi Ulu Öndər Heydər Əliyevin ruhu şaddır ki, biz artıq Müstəqilliyimizin Bərpası Gününü ərazi bütövlüyümüzün və suverenliyimizin tam təmin olunması şəraitində qeyd edirik”.
“Bir il bundan öncə bütün ərazilərimiz üzərində suverenliyimiz tam qəti və əbədi təmin edildi. Bu baxımdan, doğrudan da xoşbəxt anlar yaşayırıq. Biz bu müstəqilliyi əldə etmək üçün böyük bir mübarizə aparmışıq və şəhidlər vermişik. Onların əziz xatirəsi həmişə bizim yaddaşlarımızda qalacaq. Odur ki, bu gün müstəqilliyimizi göz bəbəyi kimi qorumalıyıq. Müstəqilliyi əldə etmək nə qədər çətindirsə, onu qoruyub saxlamaq ondan da çətin və müşkül məsələdir”, - E.Nəsirov söyləyib.
Milli Məclisin deputatı xatırladıb ki, məhz Ulu Öndər Heydər Əliyev 1993-cü ildə xalqın xahişi və tələbi ilə hakimiyyətə gəldikdən sonra Azərbaycanın real müstəqilliyi başlanıb: “Həmin tarixdən etibarən 1993-cü ildən 2003-cü ilə qədərki dövr Azərbaycan tarixinə sabitlik illəri kimi daxil oldu. İlk növbədə Ulu Öndər ordu quruculuğu məsələlərini önə çəkdi. Bunun nəticəsində 1993-cü ilin dekabrından yanvar ayına qədər olan müddətdə məşhur Horadiz əməliyyatına rəhbərlik etdi. Füzulinin Horadiz şəhəri və 22 kəndi işğaldan azad olundu və biz qələbənin nə olduğunun dadını bildik. Bundan sonra düşmən məcbur oldu ki, “Bişkek protokolu”na imza atsın və bununla da atəşkəs əldə edildi. Daha sonra “Əsrin müqaviləsi” imzalandı”.
E.Nəsirov bunu Azərbaycanın bütün gələcək iqtisadi inkişafının kökündə dayanan fundamental bir hadisə kimi dəyərləndirib və qeyd edib ki, məhz bu gün xalq onun bəhrəsini görür: “Güclü iqtisadiyyatımız formalaşdı. Ulu Öndər Heydər Əliyevin dediyi kimi, güclü iqtisadiyyata malik olan dövlət hər şeyə qadirdir. Biz həmin iqtisadiyyata söykənib güclü ordu formalaşdırdıq, tarixi zəfərə imza atdıq, ərazi bütövlüyümüzü təmin etdik. Müstəqil dövlətin sakinləri olaraq bu gün ölkəmizin bütün ərazisində müstəqilliyimizin bərpa gününü qeyd edən xalq kimi qürur hissi yaşayırıq. Qarşıda bizim ciddi hədəflərimiz var”.
Bu gün Qarabağ və Şərqi Zəngəzurun bərpası işlərinin sürətlə getdiyini söyləyən deputat vurğulayıb ki, ilin sonunacan bu məqsəd üçün 19 milyard manat vəsaitin xərclənməsi reallaşacaq: “Həm də biz Qarabağı “yaşıl zona”ya çevirməyi hədəfləmişik. Sözün həqiqi mənasında bu gün xalqımız fərəh hissi keçirir ki, qarşıda duran istənilən strateji vəzifənin öhdəsindən gəlmək iqtidarındayıq. Həm də müstəqilliyimizin 33-cü ildönümündə növbəti bir tarixi hadisə ölkəmizdə baş verəcək. Dünyanın nəbzi iki həftə ərzində Azərbaycan paytaxtında döyünəcək. COP29 tədbirinə ev sahibliyi edəcəyik. Qoy bütün dünya bir daha şahidlik etsin ki, dünyada elə də böyük olmayan bir Azərbaycan dövləti var, amma onun sözünün mənası və çəkisi böyükdür. O, 21-ci əsrdə öz ərazi bütövlüyünü və suverenliyini bərpa etmiş yeganə dövlət və xalqdır və o, eyni zamanda bütün dünyaya sülh mesajları göndərir. COP29 təkcə iqlim konfransı deyil, həm də birgəyaşayış mədəniyyəti və dünyaya sülh ismarıclarının göndərildiyi bir tədbirdir”.
Sadiq Cavadov
