“Azərbaycan Respublikasının Prezidenti cənab İlham Əliyevin müdrik və uzaqgörən siyasəti nəticəsində bu gün Qarabağ və Şərqi Zəngəzur bölgələrində genişmiqyaslı bərpa-quruculuq işləri ardıcıl və sistemli şəkildə həyata keçirilir, keçmiş məcburi köçkünlərin doğma torpaqlarına təhlükəsiz və ləyaqətli şəkildə geri dönüşü təmin edilir. Həyata keçirilən tədbirlər təkcə infrastrukturun bərpası ilə məhdudlaşmır, eyni zamanda bölgədə sosial rifahın yüksəldilməsi, təhsil, səhiyyə və digər sahələrin inkişafı istiqamətində ardıcıl addımlar atılır”.
Bunu İqtisadiyyat.az-a açıqlamasında Milli Məclisin deputatı Mircəlil Qasımlı bildirib.
Deputat vurğulayıb ki, mayın 27-də və 28-də Laçın şəhərində təşkil olunan açılış mərasimləri və strateji layihələrin istifadəyə verilməsi bölgədə əldə edilən inkişafın parlaq təzahürüdür. Xüsusilə Laçın Beynəlxalq Hava Limanının istismara verilməsi bölgənin strateji mövqeyini daha da gücləndirir. Bundan öncə Füzuli və Zəngilanda istifadəyə verilən hava limanları kimi Laçın Beynəlxalq Hava Limanı da bölgənin iqtisadi və turizm potensialının inkişafı baxımından mühüm əhəmiyyət daşıyır. Laçın şəhərinə 30 km, Şuşaya 70 km, Kəlbəcərə 60 km məsafədə yerləşən bu hava limanı regionun gələcək inkişafına önəmli töhfə verəcək. Deputat əlavə edib ki, Laçın kanat yolunun təməlinin qoyulması, “Laçın Aqro-Sənaye Parkı” çərçivəsində “PIRSHAGHI” ayaqqabı fabrikinin filialının istifadəyə verilməsi, yeni iş yerlərinin yaradılması və sahibkarlıq təşəbbüslərinə göstərilən dövlət dəstəyi bölgədə iqtisadi fəallığın artmasına geniş şərait yaradır. Dövlətimiz tərəfindən həyata keçirilən kompleks tədbirlər Laçının və ümumilikdə bölgənin dayanıqlı inkişafını təmin edir.
“Artıq bu gün beynəlxalq ictimaiyyət də tarixi torpaqların əsl sahiblərinin geri döndüyünə, bu ərazilərdə genişmiqyaslı quruculuq və abadlıq işlərinin həyata keçirildiyinə şahidlik edir. Hazırda Şərqi Zəngəzur və Qarabağda 43 mindən artıq vətəndaşımız öz yurd-yuvasında firavan şəkildə yaşayır və çalışır. Bu, Böyük Qayıdış proqramının uğurla icra olunduğunun bariz nümunəsidir”, – deyə Mircəlil Qasımlı vurğulayıb.
