"Birləşmiş Millətlər Təşkilatının İqlim dəyişmələri üzrə Çərçivə Konvensiyasının Tərəflər Konfransının 29-cu sessiyasının, yəni COP29-un Azərbaycanda keçirilməsi çox mühüm əhəmiyyət kəsb edən bir məsələdir. Məlumdur ki, 196 dövlətin, eyni zamanda Avropa İttifaqının dəstəyi və ratifikasiyası ilə məhz bu tədbirin ölkəmizdə keçirilməsi nəzərdə tutulmuşdur. COP28-dən sonra, 11 ay ərzində məhz belə bir hazırlıq işlərinin aparılması, böyük miqyaslı tədbirə ev sahibliyi etməsi, düşünürəm ki, Azərbaycan Respublikasının rəhbərliyinin, Prezident İlham Əliyevin düzgün qurduğu xarici və daxili siyasətdən irəli gəlir".

Bu sözləri İqtisadiyyat.az-a açıqlamasında Milli Məclisin deputatı Arzu Nağıyev deyib.

Onun sözlərinə görə, 72 min iştirakçının qeydiyyatdan keçməsi, eyni zamanda 80-dən çox ölkənin prezident, baş nazir və vitse-prezidentlər səviyyəsində təmsil olunması Azərbaycanın bu tədbirin keçirilməsində çox mühüm işlər gördüyünün bariz nümunəsidir:

"Bir sıra dövlətlər cəhd göstərərək, hətta siyasi baxışları ilə seçilən bir sıra qurumlar öz məkrli xarici siyasətlərini yürüdərək COP29-a maneələr törətməyə çalışırdılar. Amma təbii ki, bunlar da alınmadı. Əsas məsələ odur ki, məhz bu tədbir ölkəmizdə baş tutur və möhtəşəm bir açılış mərasimi oldu".

Deputat söyləyib ki, bəziləri neft və qaz ölkəsi olan bir dövlətin guya COP29-a necə ev sahibliyi edə bilməsi ilə bağlı ortaya sual atıblar. Amma onlar unudublar ki, bu beynəlxalq tədbir bundan əvvəl də kömür istehsalı, qaz istehsalı daimi olan istər Polşa, istərsə də digər dövlətlərdə təşkil olunub: "Yəni bəziləri tədbirə maneə törətmək üçün ciddi cəhdlə çalışırdılar. Lakin Azərbaycanın həm daxildə, həm də xaricdə apardığı müstəqil siyasət bunu bir daha sübut etdi ki, biz paralel olaraq alternativ enerji və bərpa olunan enerjidən də istifadə etməyə qadirik və edirik. Yəni, təbiətin bizə bəxş etdiyi bütün məsələlərdən istifadə edirik. Su və külək enerjisinin hər birindən istifadə edirik və bu məsələdə müsbət addımlar atılacaqdır. Məhz açılış mərasimində də BMT-nin Baş katibi cənab Quterreşin çıxışından da məlum oldu ki, bu proseslərdə Azərbaycan öndə gedən dövlətlərdən biridir". 

A.Nağıyev diqqətə çatdırıb ki, Azərbaycan gələcəkdə iqtisadi, siyasi və digər istiqamətlərdə məhz COP29-un keçirilməsi məsələsindən istifadə etməyə hazırdır: "Burada əsas məsələ dünyada havanın temperaturunun bir və bir yarım azaldılması nəticəsində çox ciddi dəyişikliklərin əldə edilməsindən söhbət gedir. Fransa və digər digərlərinin COP29-da iştirak etməməsi elə də vacib deyil. Baxmayaraq ki, havaya ən çox karbon dioksidi atan və təbiəti zəhərləyən dövlətlər də elə onlardır. Düşünürəm ki, tədbirdən sonra bunlar özləri üçün bir nəticə çıxarar. Avropa Birliyi dəfələrlə Azərbaycanı enerji təhlükəsizliyə təhdidin qarşısını alan bir dövlət kimi tanıyıb, hətta müqavilələr imzalamışdır. Bu gün təəssüflə qeyd etmək istərdim ki, bəzi özlərini siyasətçi adlandıranların, iştirakı labüd olan şəxslərin tədbirə qatılamaması da bizim üçün problem deyil. Əsas odur ki, Azərbaycanda baş tutan COP29-un nəticələrinə uyğun olaraq dünyanı narahat edən məsələlər istiqamətində ciddi addımlar atılacaq".

İsmayıl Bakuvi