“Dövlətimizin başçısı cənab İlham Əliyevin yürütdüyü ağıllı, müdrik daxili və xarici siyasət ölkəmizin nüfuzunu durmadan artırmaqdadır”.

Bu sözləri İqtisadiyyat.az-a açıqlamasında Milli Məclisin deputatı Vüqar İskəndərov deyib.

Onun sözlərinə görə, insanın ən fundamental hüquqlarıdan biri doğulduğu yerdə layiqli yaşamaq, yaratmaq və ömür sürməkdir: “Erməni vandallarının və faşistlərinin yürütdüyü siyasət nəticəsində bir milyondan çox Azərbaycan vətəndaşı öz doğulduğu dədə-baba torpaqlarından, yaşadığı və qurub-yaratdığı ərazilərdən didərgin, qaçqın və köçkün düşdü. Ali Baş Komandanın qətiyyəti, siyasi iradəsi və Azərbaycanın şanlı ordusunun şücaəti ilə biz həmin ədalətsizliyə son qoyduq, ərazilərimizi düşmən tapdağından azad etdik, düşmənləri qovduq və həmin ərazilərdə hazırda böyük quruculuq, tikinti və bərpa işləri görürük. Həm ilahi ədaləti, həm də beynəlxalq hüququn norma və prinsiplərini bərpa etmiş olduq”.

V.İskəndərov qeyd edib ki, bu gün Azərbaycan yalnız bölgədə yox, hətta qlobal anlamda reallıqlar yaradan ölkələrdən biridir: “Təbii ki, Azərbaycanın hərtərəfli inkişafında əsas vacib amillərdən biri insan faktoru və sosial siyasətdir. Bu mənada işğaldan azad etdiyimiz ərazilərdə artıq 2020-ci ildən başlayaraq çox böyük tikinti, quruculuq və bərpa işləri görürük. Cənab Prezident Böyük Qayıdış Konsepsiyasını elan edəndə söyləmişdi ki, öz yaşadığı yerdən və dədə-baba torpaqlarından didərgin düşmüş insanlar layiqli şəkildə həmin yerlərə qayıdacaqlar, xoşbəxt və firavan ömür sürəcəklər. Təbii ki, bu vəd həmişə olduğu kimi layiqincə icra olunmaqdadır”.

Deputat söyləyib ki, artıq 2020-ci ildən başlayan bu böyük tikinti-quruculuq işləri ilə paralel olaraq həm də Böyük Qayıdış Dövlət Proqramının birinci mərhələsi icra olunur: “Bu proses mərhələli şəkildə davam edir. “Böyük Qayıdış” Konsepsiyası çox uğurla və konseptual formada icra olmaqdadır. İşğaldan azad edilmiş ərazilərdə Azərbaycan yeni bir dünya düzənində yeniliklər təqdim edir. “Ağıllı kənd” - müasir çağdaş şəhərsalma mədəniyyəti təbliğ edir - tikir, yaradır, qurur, yeni dəyərləri orada tətbiq edir. Yeni çağırışlara əsasən, “yaşıl enerji” ilə bağlı vacib məsələlər həmin ərazilərimizdə icra olunur. Fantastik sürətlə icra olunan bu işlərə artıq dörd ildən artıq müddətdə milyardlarla vəsait sərf olunub. Bərpa-quruculuq işləri Azərbaycanın öz gücünə, öz mühəndis texniki bacarıqlarının hesabına icra olunmaqdadır. Bu işin çətinliyi ondan ibarətdir ki, düşmənlər həmin əraziləri mina ilə çirkləndiriblər və Azərbaycan dövləti paralel olaraq minatəmizləmə prosesini də həyata keçirməkdədir”. 

Millət vəkili vurğulayıb ki, Azərbaycan bu gün sürətlə inkişaf edən ölkə kimi azad olunmuş torpaqları da dünyanın həm ən gözəl, həm turistik, həm də aqrar bir ərazisinə çevirəcək: “Hər bir Azərbaycan vətəndaşı ölkəmizin bu sürətli inkişafından təbii ki, qürur duyacaq”.

 

İsmayıl Bakuvi