“Müzəffər Ali Baş Komandan İlham Əliyevin müdrik sərkərdəliyi ilə Vətən müharibəsində və antiterror tədbirləri nəticəsində qazanılan parlaq zəfərlər nəticəsində tarixi torpaqlarımız işğaldan azad edildi, şəhidlərimizin qisası döyüş meydanında alındı. Qalib Azərbaycan xalqı rəşadətli ordusu, qəhrəmanları ilə qürur duyur”.

Bu sözləri İqtisadiyyat.az-a Milli Məclisin Kəlbəcər rayonundan olan deputatı Mircəlil Qasımlı söyləyib.

“Azərbaycan dövləti və xalqı Birinci Qarabağ və Vətən müharibəsi dövründə şəhid olmuş qəhrəman Vətən övladlarının əziz xatirəsini daim uca tutur. 1994-cü ilin fevralında başa çatan Murovdağ əməliyyatı zamanı şəhid olmuş igidlərimizin əziz xatirələrini ehtiramla anırıq”, - deyə deputat vurğulayıb.

Qarabağın və Şərqi Zəngəzurun əsl sahiblərinin öz doğma torpaqlarına geri qayıtdıqlarını söyləyən Mircəlil Qasımlı qeyd edib ki, bu gün işğaldan azad olunmuş bütün ərazilərimizdə, o cümlədən Murovdağda üçrəngli bayrağımız qürurla dalğalanır: “Prezident İlham Əliyevin bir başa rəhbərliyi ilə tarixi torpaqlarımızda genişmiqyaslı bərpa və quruculuq işləri aparılır. Böyük qürurla deyə bilərik ki, dünyanın əz uzun avtomobil tunellərindən biri olacaq Murovdağ tunelinin inşası sürətlə həyata keçirilir”.

Deputat bildirib ki, Prezident İlham Əliyevin müdrik siyasəti nəticəsində bu gün ölkəmizdə şəhid ailələri və qazilərimiz dövlətin hərtərəfli qayğısı ilə əhatə olunublar. Onları narahat edən məsələlər daim diqqət mərkəzində saxlanılır, müxtəlif proqramlar uğurla həyata keçirilir.