Bunu İqtisadiyyat.az-a açıqlamasında Milli Məclisin deputatı Səttar Möhbalıyev deyib.
Onun sözlərinə görə, Azərbaycan Prezidenti İlham Əliyevin Çinə səfəri iki ölkə arasında əlaqələrin tamamilə yeni müstəviyə çıxmasına imkan verəcək: “Bildiyiniz kimi səfər çərçivəsində Çinlə Azərbaycan arasında çox önəmli sənədlər imzalandı. Bu sənədlərdən ən vacibi Prezident İlham Əliyev və Sədr Si Cinpin tərəfindən imzalanan “Azərbaycan Respublikası ilə Çin Xalq Respublikası arasında hərtərəfli strateji tərəfdaşlıq əlaqələrinin qurulması haqqında Birgə Bəyanat” oldu. Bu sənəd Azərbaycan ilə Çin arasında münasibətlərin inkişafında yeni dövr başlayacağına əminlik yaradır.
Bununla yanaşı “Azərbaycan Respublikası Hökuməti ilə Çin Xalq Respublikası Hökuməti arasında ümumvətəndaş pasportlarına malik vətəndaşların vizadan qarşılıqlı azad edilməsi haqqında Saziş”in böyük əhəmiyyət daşıdığını qeyd edə bilərik. Bu sənəd iki ölkə arasında turizm sahəsində inkişaf üçün yeni perspektivlər açır. Eyni zamanda səfər çərçivəsində iki ölkə arasında enerji, minaların təmizlənməsi, elm və texnologiya, texniki-iqtisadi əməkdaşlıq, investisiya, beynəlxalq multimodal daşımalar, ticarət və digər sahələrdə əməkdaşlıq haqqında sənədlər imzalandı. Bu sənədlər iki ölkə arasında mövcud potensialdan daha geniş istifadə etməklə bir çox sahələrdə əməkdaşlığın daha da dərinləşəcəyinə imkan verəcək”.
Deputat qeyd edib ki, Azərbaycanla Çin arasında nəqliyyat və logistika sahəsində əməkdaşlığın inkişafını xüsusi qeyd etmək lazımdır: “Transxəzər Beynəlxalq Nəqliyyat Marşrutu (TBNM) və Bakı-Tbilisi-Qars dəmir yolu Çinin Avropa bazarlarına çıxışını sürətləndirmək üçün vacib arteriyalar hesab olunur. Azərbaycan bu layihələrin əsas iştirakçılarından biri olaraq Çinlə logistika sahəsində əməkdaşlığını gücləndirir. Bakı Beynəlxalq Dəniz Ticarət Limanı və Ələt Azad İqtisadi Zonası bu əməkdaşlığın logistik mərkəzi kimi çıxış edir. Bu gün Çin-Azərbaycan münasibətləri sabit və qarşılıqlı faydalı əməkdaşlıq prinsiplərinə əsaslanır. Qlobal dəyişikliklər və yeni geosiyasi reallıqlar fonunda bu münasibətlər daha da əhəmiyyət qazanır”.
Elçin Mehdiyev
