Azərbaycan hökumətinin Qarabağda yaşayan erməni icmasının üzvləri ilə təması, ardınca separatçıların məlum təxribatı diqqətləri yenidən sözügedən əraziyə yönəldib.

Son bir həftə ərzində baş verənlərlə bağlı İqtisadiyyat.az-a danışan Milli Məclisin deputatı Tural Gəncəliyev öncə reinteqrasiya prosesindən söz açıb:

“Qarabağda reinteqrasiya prosesi Azərbaycanın sırf daxili işidir və bu proses artıq başlayıb, ilkin təmaslar qurulub. Hesab edirəm ki, getdikcə bu proses daha da sürətlənəcək və daha geniş şəkildə bütün Qarabağ bölgəmizi əhatə edəcək. Əslində bu proses 44 günlük Vətən müharibəsindən sonra başlamışdı, təmaslar qurulmuşdu. Lakin Ruben Vardanyan kimi destruktiv bir ünsürün peyda olması bu prosesə mənfi təsir göstərməyə başladı. Azərbaycan dövlətinin qətiyyətli və təkidli mövqeyi ilə R.Vardanyan faktoru aradan qaldırıldı. Ona görə hesab edirəm ki, reinteqrasiya prosesi Azərbaycan konstitusiyasının qanunlarının, suverenliyinin Qarabağ bölgəsində rus sülhməramlılarının müvəqqəti yerləşdiyi bölgədə tam həyata keçiriləcək”. 

Separatçıların son təxribatından da danışan millət vəkili Azərbaycan ordusunun gördüyü və görəcəyi cavab tədbirlərini tam legitim hesab edərək beynəlxalq ictimaiyyətdən gözləntisini dilə gətirib: 

“Hərbçilərimizin ermənilərə məxsus avtomobili yoxlamaqla bağlı qanuni tələblərinə cavab olaraq atəş açılması bir terror hadisəsidir və qəbuledilməzdir. Təsəvvür edin ki, biz, elə mənim özüm də daxil olmaqla, torpaqlarından didərgin düşmüş bir milyondan çox məcburi köçkün işğaldan azad edilmiş torpaqlara böyük qayıdışla bağlı düşünürük, gözləyirik. Amma səhəri günü o yollarda hərəkət edərkən silahlı erməni bandası qarşımıza çıxıb bizə atəş açacaq və bizim həyatımıza təhlükə yaradacaq. Bu bir daha sübut etdi ki, erməni silahlıları sonuncu şəxsinə qədər tərkisilah olunmalıdır. Bununla yanaşı, Azərbaycanla Ermənistan arasında sərhəd zolağında sərhəd-buraxılış rejimi yaradılmalıdır ki, belə qanunsuz silahlılar ərazilərimizdə hərəkət edə bilməsinlər. Azərbaycan ərazisində qondarma pasport-viza rejimi ilə məşğul olan hansısa polis qüvvələrinin mövcudluğu qəbuledilməzdir. 

Biz bu mövzuda Qərb ölkələrindən, beynəlxalq ictimaiyyətdən ədalətli mövqe gözləyirik. Əgər ABŞ və digər qərb ölkələri öz sərhədlərindən 10 minlərlə kilometr uzaqlarda - Suriyada, İraqda, Liviyada və başqa ölkələrdə terrorla mübarizə adı altında hərbi əməliyyatlar keçirə bilirsə, Azərbaycanın da öz ərazilərində legitim hədəf olan terrorçulara qarşı hansısa bir şəkildə antiterror əməliyyatı keçirməsinə tam haqqı var. Əgər qərb ikili standartlar nümayiş etdirmirsə, bu məsələdə Azərbaycanın haqlı səsi müdafiə olunmalı və bizə dəstək verilməlidir”.