Suriyanın silahlı müxalifəti Dəməşq və ətraf rayonlarda komendant saatını ləğv edib.

İqtisadiyyat.az xəbər verir ki, bu barədə “Əl-Cəzirə” telekanalı məlumat yayıb.

Dəməşqdə komendant saatı dekabrın 8-də yerli vaxtla saat 16:00-dan 06:00-a qədər tətbiq olunmuşdu.

Suriyada siyasi vəziyyət noyabrın sonunda silahlı yerli müxalifət qruplarının hökumət qoşunlarına qarşı irimiqyaslı hücuma keçməsi ilə mürəkkəbləşib. Nəticədə onlar bir neçə yaşayış məntəqəsini nəzarətə götürüblər və dekabrın 8-nə keçən gecə paytaxt Dəməşq şəhərini ələ keçiriblər. Bunun fonunda Suriya qoşunlarının komandanlığı prezident Bəşər Əsədin hakimiyyəti dövrünün başa çatdığını elan edib.

Bundan sonra Bəşər Əsəd və ailə üzvləri Suriyanı tərk edərək Rusiya Federasiyasının paytaxtına uçub. Kremldə deyildiyi kimi, Rusiya prezidenti Vladimir Putin xarici həmkarına sığınacaq verilməsi barədə şəxsən göstəriş verib.