Danimarka hökuməti Ukraynaya hərbi yardımı 4,4 milyard kron (təxminən 629 milyon dollar) artırmaq qərarına gəlib. Beləliklə, 2028-ci ilə qədər yardımın ümumi məbləği 64,8 milyard kron (9,26 milyard dollar) təşkil edəcək.
İqtisadiyyat.az xəbər verir ki, bu barədə krallığın müdafiə naziri Troels Lund Poulsen məlumat verib.
"Müharibə başlayandan bəri Danimarka ən fəal donor ölkələrdən biri olub, biz eyni ruhda davam etməliyik, ona görə də şadam ki, Folketinqdəki (parlament) partiyaların böyük əksəriyyəti bizi dəstəkləyir", - nazir qeyd edib.
Ötən həftə Krallığın Müdafiə Nazirliyi Kopenhagen və Kiyev arasında müdafiə-sənaye əməkdaşlığını genişləndirmək üçün hökumətin Ukraynaya 2,2 milyard kron (313,7 milyon dollar) dəyərində 17-ci yardım paketini təsdiqlədiyini açıqlamışdı.
