Çin və Türkiyənin Ukraynadakı vəziyyətlə bağlı mövqeyi oxşardır və bir-biri ilə sıx əlaqə saxlamalıdır. 

İqtisadiyyat.az xəbər verir ki, bunu Çin Prezidenti Si Cinpin deyib.  

"Çin və Türkiyənin Fələstin-İsrail münaqişəsi, Ukrayna böhranı və digər məsələlərlə bağlı eyni və ya oxşar baxışları var", - deyə Çin lideri Türkiyə Prezidenti Rəcəb Tayyib Ərdoğanla ŞƏT+ formatında görüşü zamanı qeyd edib. 

Çin Xalq Respublikasının sədri Pekin və Ankara arasında sıx təmasların davam etdirilməsinin zəruriliyinə diqqət çəkib. O, Çin və Türkiyə arasında münasibətlərin davamlı inkişafına diqqət çəkərək, hər iki dövlətin qlobal Cənubun inkişaf etməkdə olan ölkələrinə aid olduğunu bildirib.

"Çin və Türkiyə qarşılıqlı əsas maraqları nəzərə alaraq bir-birini dəstəkləməli, siyasi etimadı daim gücləndirməli, qarşılıqlı faydalı yüksək səviyyəli əməkdaşlığı təşviq etməli və ikitərəfli strateji əməkdaşlığı daha fəal şəkildə inkişaf etdirməyə çalışmalıdır", - Si Cinpin vurğulayıb.