Çinin Sıçuan əyalətində ailədə uşaqların sayına qoyulan məhdudiyyət aradan qaldırılıb.

İqtisadiyyat.az xəbər verir ki, bu, ölkədə doğum səviyyəsinin aşağı düşməsi ilə mübarizəyə yönəlmiş növbəti addımdır. Üstəlik, əyalət hökuməti qərara alıb ki, bundan sonra nikahdankənar dünyaya gətirilən uşaqlar da rəsmi qeydiyyata alınacaq və belə uşaqların ana-ataları evli cütlüklər kimi bütün müavinətləri ala biləcəklər.

Çin hakimiyyəti bir neçə ildir ki, “bir ailə - bir uşaq” siyasəti nəticəsində yaranmış mənfi demoqrafik tendensiyanın dəyişdirilməsinə çalışır. Ötən il Çinin əhalisi son 60 ildə ilk dəfə azalıb. Əslində “tək uşaq” siyasəti mərhələli şəkildə bir neçə ildir ki, ləğv edilib. 2016-cı ilin əvvəlindən bütün ailələrə iki uşaq dünyaya gətirməyə icazə verildi. Lakin bu, hakimiyyətin gözlədiyi doğum nisbətinin davamlı artmasına səbəb olmadı. 2021-ci ildə isə ailələrə üç uşaq sahibi olmağa icazə verildi. Çinli ekspertlər bu il ərzində ölkənin daha bir neçə əyalətində uşaq sayına qoyulan məhdudiyyətin tam aradan qaldırılacağını proqnozlaşdırır.