Çin Xalq Respublikasının xarici işlər nazirinin müavini Sun Veydonq və Ukrayna xarici işlər nazirinin birinci müavini Andrey Sibiqa Pekində Ukrayna böhranını müzakirə ediblər. 

İqtisadiyyat.az xəbər verir ki, bu barədə Çin Xarici İşlər Nazirliyi məlumat yayıb.

Məlumatda bildirilir ki, diplomatik məsləhətləşmələr zamanı tərəflər Ukrayna böhranı, qarşılıqlı maraq doğuran beynəlxalq və regional məsələlər ətrafında fikir mübadiləsi aparıblar.

Sun Veydonun sözlərinə görə, Çin iki dövlət başçılarının mühüm konsensusunu həyata keçirmək üçün Ukrayna ilə əməkdaşlığa hazırdır: "Pekin qarşılıqlı hörmət və səmimi münasibətlərdən ibarət yaxşı ənənənin inkişaf etdirilməsinin tərəfdarıdır". 

Çin diplomatı qeyd edib ki, ÇXR Ukrayna ilə birlikdə hər zaman iki xalqın əsas və uzunmüddətli maraqlarına diqqət etməyə, müxtəlif sahələrdə mübadilə və əməkdaşlığı təşviq etməyə, Çin-Ukrayna münasibətlərini dəstəkləməyə və inkişaf etdirməyə hazırdır.