Çinin sədri Si Cinpin iyulun 2-dən 6-dək beynəlxalq turneyə çıxacaq, o, Şanxay Əməkdaşlıq Təşkilatının (ŞƏT) sammitində iştirak edəcək, Qazaxıstan və Tacikistana səfər edəcək.
İqtisadiyyat.az xəbər verir ki, bu barədə Çin Xalq Respublikasının Xarici İşlər Nazirliyi məlumat yayıb.
"İyulun 2-dən 6-dək Çin Xalq Respublikasının sədri Si Cinpin Astanada ŞƏT-ə üzv ölkələrin Başçıları Şurasının 24-cü iclasında iştirak edəcək, Qazaxıstan Respublikası və Tacikistan Respublikasına dövlət səfərləri edəcək", - Çin Xarici İşlər Nazirliyindən bildirilib.
Qeyd edilib ki, Si Cinpin bu dövlətlərin liderlərinin dəvəti ilə Qazaxıstan və Tacikistana səfər edəcək.
ŞƏT sammiti iyulun 4-də Astanada Müstəqillik Sarayında baş tutacaq. Təşkilatın baş katibi Zanq Minqin də tədbirdə iştirakı gözlənilir. İclasa BMT-nin baş katibi Antonio Quterreş və bəzi beynəlxalq təşkilatların rəhbərləri dəvət olunub.
