Çexiyanın baş naziri Petr Fiala aprelin 15-də Ağ Evdə keçirilməsi planlaşdırılan danışıqlarda ABŞ prezidenti Co Baydenlə Yaxın Şərqdəki vəziyyəti və Ukraynaya yardımı müzakirə edəcək.
İqtisadiyyat.az xəbər verir ki, bu barədə bazar günü hökumət başçısı Vaşinqtona uçmazdan əvvəl jurnalistlərə bildirib.
"Aydındır ki, Yaxın Şərqdəki vəziyyət danışıqların mövzusu olacaq", - Fiala bildirib. O, İranın İsrail ərazisini atəşə tutmasını pisləyib və İsrailin özünü müdafiə etmək hüququna malik olduğunu vurğulayıb. Baş nazir xüsusilə qeyd edib ki, vəziyyətin daha da gərginləşməməsi üçün həll yolu tapmaq lazımdır.
Hökumət başçısı ABŞ-yə səfəri zamanı Ukraynaya yardım məsələlərinə xüsusi diqqət yetirmək niyyətindədir: "Mən bütün danışıqlarda bu mövzuya toxunacağam".
Fialanın səfər proqramına ABŞ prezidenti ilə qəbuldan əlavə, Nümayəndələr Palatasının sədri Mayk Conson və ABŞ Konqresinin digər üzvləri ilə görüşlər daxildir. O, Hudson İnstitutunda da çıxış edəcək.
