Koreya Respublikası Yaponiyanın baş naziri Fumio Kişidanın Asiya ölkələrində yapon militarizminin simvolu sayılan Yasukuni ziyarətgahına qurban göndərməsindən təəssüflənir.
İqtisadiyyat.az xəbər verir ki, bu barədə Cənubi Koreya Xarici İşlər Nazirliyi məlumat yayıb.
"Hökumət Yaponiya rəsmilərinin Yaponiyanın keçmişindəki təcavüzkar müharibələrini tərənnüm edən və müharibə cinayətkarlarının adlarını əbədiləşdirən Yasukuni məbədini yenidən ziyarət etmələrinə görə məyusluğunu və təəssüfünü bildirir", - Seul bildirib.
"Biz Yaponiyadakı məsul şəxsləri tarixə obyektiv baxmağa, keçmişi düşünmək cəhdlərini nümayiş etdirməyə çağırırıq. Bu, gələcəyə yönəlmiş ikitərəfli əlaqələrin inkişafı üçün mühüm əsas olacaqdır", - bəyanatında qeyd olunub.
Qeyd edək ki, Kişida Tokiodakı Yasukuni Şinto məbədinə qurban göndərib. İqtisadi bərpa naziri Yoşitaka Şindo da öz növbəsində məbədi şəxsən ziyarət edib.
