Şimali Koreya və Rusiya bir-birinə hərbi yardım göstərilməsi haqqında saziş imzaladıqdan sonra Cənubi Koreya hökuməti cümə axşamı bildirib ki, Ukraynaya silah tədarükü ilə bağlı mövqeyini nəzərdən keçirəcək. 

İqtisadiyyat.az xəbər verir ki, bu barədə "Yonhap" yazır.  

Qeyd edilir ki, Moskva və Pxenyan arasında əldə olunan razılaşmaya əsasən, onlardan birinə hücum olacağı təqdirdə qarşılıqlı hərbi yardım göstəriləcək.

Ölkənin milli təhlükəsizlik müşaviri Çan Ho-jin də çərşənbə günü Pxenyanda keçirilən sammit zamanı Rusiya prezidenti Vladimir Putin və Şimali Koreya lideri Kim Çen İnin imzaladığı hərtərəfli strateji sazişi pisləyib.

"Hökumət dərin narahatlığını ifadə edir və Şimali Koreya ilə Rusiya arasında qarşılıqlı hərbi və iqtisadi əməkdaşlığı gücləndirmək məqsədi daşıyan Hərtərəfli Strateji Tərəfdaşlıq Sazişinin imzalanmasını pisləyir", - Çan deyib.

O, Şimali Koreyanın hərbi qüdrətini birbaşa və ya dolayısı ilə artıran hər hansı əməkdaşlığın BMT Təhlükəsizlik Şurasının qətnamələrinin pozulması olduğunu və beynəlxalq nəzarətə və sanksiyalara məruz qalacağını vurğulayaraq, müvafiq tədbirlər görəcəyinə söz verib.

Prezidentin sözçüsü Cənubi Koreyanın Ukraynaya tədarük edəcəyi silah növləri ilə bağlı strateji qeyri-müəyyənliyi qoruyacağını bildirib.

Hökumət mənbələrinin bildirdiyinə görə, siyahıya zenit sistemləri daxil ola bilər, çünki Ukraynanın Rusiya hava hücumlarına qarşı çıxmaq üçün raket əleyhinə qalxanlara ehtiyacı var.