Təxminən bir illik axtarışlardan sonra Cennifer Lopez və Ben Afflek nəhayət özlərinə ev alıblar. İqtisadiyyat.az xarici mediaya istinadən xəbər verir ki, onların yeni evi Beverli Hillsdə yerləşir. 4300 kvadrat metrlik möhtəşəm malikanə üçün cütlük 60,85 milyon dollar ödəyib. Onların pulu nağd qaydada ödədiyi bildirilir. 

 İqtisadiyyat.az-ın məlumata görə, əslində ev 75 milyon dollara satılırdı. Lakin cütlüyün israrından və 1 həftəlik danışıqlardan sonra sahibi evin qiymətində 15 milyon dollarlıq endirim edib. Malikanə ilk dəfə 6 il əvvəl 135 milyon dollara satışa çıxarılıb. 

"Wallingford malikanəsi" kimi tanınan ev ümumilikdə 5 hektar əraziyə sahibdir. Bu böyük iqamətgahda 12 yataq və 24 hamam otağı var. Evin satış elanında qeyd olunub ki, "malikanə yeni tikilib və genişləndirilib”. Ultra-lüks iqamətgahın 12 avtomobillik qarajı və 80 avtomobillik dayanacağı da diqqət çəkir. 

Nəhəng ev böyük və qapalı idman salonu ilə də təchiz edilib. Salonda basketbol meydançası və boks rinqi də quraşdırılıb. Malikanənin 5000 kvadratmetrlik qonaq evi də ayrıca vurğulanmalıdır. 

Bu cür böyük iqamətgah əlbəttə mühafizəsiz olmaz. Ərazidə mühafizə binası və mühafizəçilərin yaşaması üçün iki otaqlı ev də tikilib.

Bunlar da hələ son deyil. Məlumatlarda qeyd olunur ki, malikanə gözəllik salonu, ev kinoteatrı, şərab anbarı, viski salonu, bar, sauna və masaj otaqları ilə də təchiz olunub. 

Əmlakın böyük hovuzu, həmçinin ümumi girişlərdən əlavə şəxsi qapıları olan iki özəl girişi də var. Media yazır ki, Lopez və Afflek evi alan kimi köçməyə başlayıblar.