Cəlilabad rayonunda çiyələk məhsulunun yığımı yekunlaşıb, rekord həddə məhsul toplanıb.
Cəlilabad Rayon Statistika İdarəsindən İqtisadiyyat.az-ın sorğusuna verilən məlumata görə, bu il 606 hektar sahədə çiyələk bitkisi əkilib.
Ötən il isə, bu rəqəm 506 hektar olub. Əkin sahəsinin artırılması məhsulun bolluğuna səbəb olub. Bu il sahələrdən 16 100 ton məhsul toplanıb. Keçən il isə bu rəqəm 12 860 ton olub.
Cəlilabad Dövlət Aqrar İnkişaf Mərkəzindən isə İqtisadiyyat.az-ın sorğusuna cavab olaraq bildirilib ki, toplanan çiyələyin böyük bir hissəsi - 11 967 tonu xarici bazarlara ixrac olunub. Məhsul əsasən rayonun Göytəpə şəhəri, Sabirabad və Maşlıq kəndlərində becərilir. Mərkəzdən həmçinin o da qeyd edilbi ki, məhsul əsasən Rusiya və ərəb ölkələrinin bazarlarına göndərilib.
Fermerlər bu il daha çox çiyələk əkininə maraq göstərmələrini bir neçə səbəblə əlaqələndirib. Onların sözlərinə görə, bu səbəblər məhsulun daha rentabelli və xarici bazarlara rahat ixrac olunmasıdır.
Qeyd edək ki, hazırda rayon ərazisində gələn ilin məhsulu üçün çiyələk bitkisinin əkini aparılır və əkin sahələrinin 50-60 hektar artırılacağı gözlənilir. Onu da əlavə edək ki, cari il rayonda 578 fermer tərəfindən çiyələk yetişdirilib.
