“Yaxın zamanlarda İran-Azərbaycan münasibətlərinin normallaşması da, Rusiyanın iki ölkə arasında vasitəçilik etməsi də inandırıcı deyil”.
Bu sözləri İqtisadiyyat.az-a açıqlamasında politoloq Samir Hümbətov deyib. O bildirib ki, son terror aktından sonra gərginlik daha da artacaq:
“Deputat Fazil Mustafa da İrandan şübhələnir. Bu son terror aktından sonra bütün oxlar İrana tərəf yönəlib və belə başa düşmək olar ki, artıq İran Azərbaycanda yüksək rütbəli məmurlara qarşı terror törətməyə çalışır. Bu isə o deməkdir ki, İran və Azərbaycan arasında gərginlik artan xətlə davam edəcək.
Mən düşünmürəm ki, yaxın zaman ərzində iki ölkə münasibətlərinin düzəlməsi mümkündür. Bunun üçün bir sıra şərtlər var ki, İran yerinə yetirməlidir. Lakin İranın bunları yerinə yetirəcəyi inandırıcı görünmür. İran atdığı addımlara - səfirliyimizə edilən hücuma və son terror aktına görə üzr istəməlidir. Amma bu da inandırıcı deyil".
Politoloq həmçinin qeyd edib ki, indiki vəziyyətdə Rusiyaya İran-Azərbaycan gərginliyi sərf edir:
“Ona görə mən inanmıram ki, Rusiya iki ölkə arasında vasitəçi olsun. Əksinə, Rusiya bu gərginliyin davam etməsini istəyir. Rusiya Ermənistanla Azərbaycan arasındakı münasibətləri korlamağa çalışırsa, aydındır ki, digərlərinə də o münasibəti göstərəcək”.
Cavidan Mirzəzadə / İqtisadiyyat.az
