Dünya üzrə 1,3 milyard tütün istifadəçilərinin 80 faizindən çoxu aşağı və orta gəlirli ölkələrdə yaşayır. Tütün məmulatlarından istifadə edənlərin təxminən yarısı tütünlə əlaqəli xəstəliklər səbəbindən tez ölür.
Hər il tütündən istifadə səbəbindən həyatını itirən 8 milyondan çox insanın təxminən 1,3 milyonu tütün tüstüsündən istifadə etmədiyi halda ona məruz qalanlardır.
Təxminən 700 milyon uşaq tütün tüstüsündən əziyyət çəkir. Hər il 65 000 uşaq passiv təsir nəticəsində yaranan tənəffüs yollarının infeksiyaları səbəbindən 5 yaşına çatmamış ölür.
Bu barədə İqtisadiyyat.az dünya mediasına istinadən bildirir.
1,4 trilyon dollar iqtisadi itki proqnozlaşdırılır
Tütün məmulatları həm iqtisadiyyata, həm də sağlamlığa ziyan vurur. ÜST hesab edir ki, tütün məmulatlarının istifadəsi nəticəsində iqtisadi itki hər il 1,4 trilyon dollar təşkil edir.
Ətraf mühitə zərərli olan siqaret dünyada ən çox atılan tullantılardır. Kötüklərindəki kimyəvi maddələr və elektron siqaret tullantıları suya və torpağa sızaraq təbiətə ziyan vurur.
Tütün sənayesi siqaret istehsalı üçün hər il təxminən 600 milyon ağacın kəsilməsində günahlandırılır.
Bu vərdişdən imtina edənlərin səhhəti ilk gündən yaxşılaşır
Bu asılılıqdan xilas olmaq sağlamlıq, sosial, iqtisadi və ekoloji faydalar əldə etməyə imkan verir. ÜST 30 yaşlarında siqareti buraxanların ömrünün siqaret çəkməyə davam edənlərlə müqayisədə təxminən 10 il uzandığını deyir.
Siqareti tərgitdiyi ilk gündən yüksək ürək döyüntüləri, qan təzyiqi, karbonmonoksit səviyyəsi normallaşır və zaman keçdikcə immunitet sistemi güclənir. Təxminən 2-12 həftə ərzində qan dövranı yaxşılaşır və ağciyər tutumu artır.
