Cəlilabad rayonunda ötən il kartof yetişdirilmiş sahələrin bəzilərində bu il çiyələk əkilib.

Bu barədə İqtisadiyyat.az-a bir qrup fermer məlumat verib.

Onların sözlərinə görə, ötən il kartof məhsuldarlığı az olduğu üçün əkin sahələrini çiyələklə əvəzləyiblər. Hazırda rayonda çiyələk məhsulunun yığımı davam edir. 

Cəlilabad Rayon Statistika İdarəsindən İqtisadiyyat.az-a bildirilib ki, bu il 606 hektar sahədə çiyələk bitkisi əkilib. Ötən il isə, bu rəqəm 506 hektar olub. Əkin sahəsinin artırılması məhsulun bolluğuna səbəb olub. Belə ki, bu günə qədər sahələrdən 14 280 ton məhsul toplanıb. Keçən ilin müvafiq dövründə bu rəqəm 11 727 ton olub. 

Cəlilabad Dövlət Aqrar İnkişaf Mərkəzindən isə İqtisadiyyat.az-a qeyd edilib ki, bu günə qədər toplanan çiyələyin böyük bir hissəsi - 11 203 tonu (826 yük avtomobili) xarici bazarlara ixrac olunub. Məhsul əsasən rayonun Göytəpə şəhəri, Sabirabad və Maşlıq kəndlərində becərilir. Mərkəzdən həmçinin o da bildirilib ki, məhsul əsasən Rusiya və ərəb ölkələri bazarlarına göndərilir.

Fermerlər, bu il daha çox çiyələk əkininə maraq göstərmələrini bir neçə səbəblə əlaqələndirib. Onların sözlərinə görə, bu səbəblər məhsulun daha rentabelli və xarici bazarlara rahat ixrac olunmasıdır.

Qeyd edək ki, çiyələk yığımının hələ bir neçə ay davam etməsini nəzərə alsaq, bu il rekord həddə məhsul yığımına yəqin ki, şahid ola biləcəyik. Məlumat üçün bildirək ki, Cəlilabad rayonunda kartof əkin sahələri əvvəlki illərlə müqayisədə azalıb. Rəsmi məlumata görə, ötən il bu rayonda 5500 hektar sahədə kartof əkilmişdisə, cari ildə bu rəqəm 2900-ə enib.