Məlumdur ki, yay aylarında bəzi insanlar xarici ölkələrdə istirahətə üstünlük verirlər. Müşahidələrə görə, insanlarımız hər ilin yay aylarında sərfəli olması baxımından daha çox Türkiyə və Gürcüstana getməyə üstünlük verirdilər. Maraqlıdır ki, başqa hansı ölkələrə səfər etmək məqsədəuyğun ola bilər?
Mövzu ilə bağlı “Azərbaycan turizm blogerləri Assosiasiyası” İctimai Birliyinin üzvü, səyahət blogeri Azər İsmayıl İqtisadiyyat.az-a açıqlamasında bildirib ki, hazırkı dövrdə Gürcüstan və Türkiyəyə səfər etmək artıq sərfəli deyil. Ona görə də vətəndaşlarımız başqa ölkələrə də üz tuta bilərlər:
"Vətəndaşlarımız quru sərhədləri açıq olanda avtobus, qatar və ya avtomobillə Gürcüstüna səfər etməyə üstünlük verirdilər. İndiki məqamda Gürcüstana getmək o qədər də sərfəli deyil. Çünki aviabiletlərin qiyməti kifayət qədər bahadır. Bundan başqa, kütləvi axınla əlaqədar olaraq Gürcüstanda qiymətlər də bahalaşıb. Eyni zamanda Türkiyədə Rusiyadan gələn turistlərin sayında artım var və tələbin artması qiymətlərin bahalaşmasına səbəb olub. Bu baxımdan Azərbaycandan Türkiyəyə olan tur paketlərin, o cümlədən hotellərin qiymətlərində ciddi dəyişiklik var. Türk lirəsinin dəyərdən düşməsi də daxildə qiymətlərin artımına yol açıb.
Azərbaycan vətəndaşı üçün alternativ marşrut kimi Birləşmiş Ərəb Əmirliklərini (BƏƏ) misal göstərmək olar. Bir müddət öncə “Wizz Air” aviaşirkəti tərəfindən Azərbaycandan Birləşmiş Ərəb Əmirliklərinə birbaşa uçuşlar açılıb. “Wizz Air Abu Dhabi” aviaşirkəti ən aşağı yanacaq sərfiyyatı, tullantı və səs göstəricilərinə malik ən müasir 4 “Airbus A321neo” təyyarəsindən ibarət ən gənc hava donanmasına malikdir. “Airbus A321neo” təyyarəsi 240 nəfərə yaxın sərnişin daşıya bilir və bu, kifayət qədər böyük rəqəmdir. Qiymətləri isə Azərbaycan Hava Yolları, Flydubai və Air Arabia Hava Yolları şirkəti ilə müqayisədə daha ucuzdur. Belə ki, qiymətlər bir tərəf üzrə təxminən 50 euro arasında dəyişir. Uçuşların sayı isə həftə üzrə 7 dəfə olsa da, bundan sonra 10 dəfə olacaq. Onu da qeyd edim ki, yaxın zamanlarda Azərbaycan və BƏƏ arasında viza rejimi ləğv ediləcək. Bu qərar Birləşmiş Ərəb Əmirliklərinə gedənlərin sayını artıracaq".
Xarici ölkələrdə istirahətə üstünlük verənlərə tövsiyələr verən ekspertə görə, Avropa ölkələrinə də üz tutmaq olar:
"Büdcədən asılı olaraq, vətəndaşlarımız Avropaya da gedə bilərlər. Lakin Avropaya viza almaq məsələsi bir qədər qəlizdir. Ən yaxşı halda iyulun sonu, avqustun əvvəlləri səfirlikdən viza növbəsi götürmək mümkündür.
Tur paketi və ya fərdi istirahət seçiminə gəlincə, vətəndaş Türkiyəyə gedirsə və "hər şey daxil" sisteminə üstünlük verirsə, bu zaman tur paketdən istifadə etmək daha yaxşıdır. Çünki qiymətlər daha aşağı olur və turistin hotel, yemək, şirkət axtarmaq kimi qayğıları olmur".
Gülşən Şərif
