Tailand hökuməti iqtisadi artımı stimullaşdırmaq üçün əhaliyə ümumilikdə 4,4 milyard dollar məbləğində nağd ödənişləri təsdiqləyib.
İqtisadiyyat.az bu barədə "The Straits Times"a istinadən xəbər verir.
Ödənişlər ölkədə 14,6 milyon insana, o cümlədən 12,4 milyon dövlət sosial sığorta kartı sahibinə və 2,15 milyon əlil insana veriləcək.
Sentyabrın 17-də Nazirlər Kabinetinin iclasından sonra keçirilən brifinqdə maliyyə naziri bildirib ki, hökumət sentyabrın 25-də hər bir vətəndaşa 300 dollar verəcək. Ödəniş prosesinin sentyabrın sonunadək başa çatdırılması gözlənilir.
Qeyd edilib ki, ölkə iqtisadiyyatı son on ildə ildə təxminən 2% artıb ki, bu da qonşu İndoneziyanın artım tempindən xeyli azdır. İkinci rübdə isə ölkə iqtisadiyyatı 2,3% artıb.
Dünya Bankının məlumatına görə, 2022-ci ildə Taylandın əhalisi 71,7 milyon nəfər olub.
Gözəl Həşimova
