Dünya ixracı bu ilin birinci rübündə illik bazda 0,6% azalaraq 5 trilyon 919 milyard dollar olub.

İqtisadiyyat.az xəbər verir ki, bu barədə Ümumdünya Ticarət Təşkilatının (ÜTT) bu ilin birinci rübü üçün açıqladığı hesabatında deyilir.

Hesabat dövründə qlobal mal ticarəti rüblük bazda 1%, xidmət ticarəti isə 1,5% artıb. Bildirilib ki, bu il mülayim artım davam edəcəyi təqdirdə qlobal ticarət 32 trilyon dollara çata bilər.

Qlobal ticarətin artımına Çin (9%), Hindistan (7%), ABŞ-nin (3%) ixrac göstəriciləri təsir edib. Digər tərəfdən Avropanın ixracatında artım olmasa da, Afrikanın ixracı bu dövrdə 5% azalıb. Digər inkişaf etmiş ölkələrin idxalı sabit qalıb, ixracı isə 1% artıb.

ABŞ və xüsusilə Asiyanın əsas inkişaf etməkdə olan iqtisadiyyatları üçün müsbət ticarət dinamikası ilə ilin birinci yarısında mal ticarətinin 250 milyard dollar, xidmət ticarətinin isə 100 milyard dollar artacağı gözlənilir.

Bu ilin birinci rübündə qlobal əmtəə və xidmət ticarəti orta səviyyədə artsa da, yaşıl enerji və süni intellektlə əlaqəli məhsulların ticarətində güclü artım müşahidə olunub.

Gözəl Həşimova