İşğaldan azad olunmuş ərazilərdə aparılan işlərə məhz həmin rayonlardan olan insanların cəlb edilməsi məsələsinə aydınlıq gətirilib.

İqtisadiyyat.az xəbər verir ki, bu, “Nazirlər Kabinetinin 2022-ci ildə fəaliyyəti haqqında hesabat”da əksini tapıb.

Sənəddə qeyd edilib ki, İqtisadiyyat Nazirliyinə təqdim olunan işğaldan azad olunmuş ərazilərlə bağlı layihələrə dair məlumatlar nazirlik tərəfindən dəqiqləşdirilir, fəaliyyət sahəsi, inzibati rayon, investisiya məbləği və s. üzrə təsnifləşdirilir və müvafiq məlumat bazasına daxil edilir.

Eyni zamanda təhlillər nəticəsində potensial hesab edilən layihələr üzrə sahibkarlıq subyektləri ilə görüşlər təşkil edilir, görüşlər zamanı həmin bölgələrdən olan sakinlərin işə qəbul edilməsi istiqamətində müvafiq tövsiyələr verilir. Qeyd olunanlarla yanaşı əhalinin işğaldan azad olunmuş ərazilərə qayıdışı və dayanıqlı məskunlaşması çərçivəsində məşğulluğun təmin edilməsi, eləcə də məcburi köçkünlərin işlə təmin edilməsi hazırda ən vacib məsələlərdən biri hesab olunur. Azad edilmiş Zəngilan rayonunun Ağalı kəndinə qayıtmış 325 şəxsin iqtisadi fəal sakinləri ilə fərdi qaydada görüşlər keçirilib, onların məşğulluq imkanları müəyyən edilib, 2022-ci il ərzində 9 nəfər özünüməşğulluq proqramı çərçivəsində müxtəlif aktivlərlə, 68 nəfər işlə təmin olunub, 10 nəfər haqqı ödənilən ictimai işlərə cəlb olunub.

2022-ci ilin 22, 27, 29 dekabr tarixlərində Qaçqınların və Məcburi köçkünlərin işləri üzrə dövlət komitəsinin Azərbaycan Respublikası Prezidentinin Şuşa rayonunda Xüsusi Nümayəndəliyi, Dövlət Məşğulluq Agentliyi, “Abşeron Group” şirkəti ilə əməkdaşlığı və iştirakı ilə 2023-cü ildən etibarən Şuşa şəhərində fəaliyyətə başlaması nəzərdə tutulan müəssisələrdə yerli əhalinin işlə təmin olunması məqsədilə əmək yarmarkası təşkil olunub. Nəticədə 300 nəfərə yaxın məcburi köçkünün Şuşa şəhərində işləmək üçün ilkin olaraq müvafiq təlimlərə cəlb edilərək işlə təmin olunmaları nəzərdə tutulub.