Bu gün Bakıda prezident İlham Əliyevə Türkiyənin yeni istehsalı olan “Togg T10X” elektromobilinin təqdim edilməsi mərasimi keçiriləcək.

Prezident İlham Əliyev bu gün Tacikistana səfər edəcək. Azərbaycan Prezidentinin həmkarı İmam Əli Rəhmanla görüşü, həmçinin Düşənbədə Azərbaycan-Tacikistan investisiya forumunda iştirakı gözlənilir. Tərəflər sənaye, energetika, turizm və digər sahələrin inkişafını müzakirə edəcəklər.

Milli Məclisin bu gün keçiriləcək plenar iclasının gündəliyinə dəyişiklik edilib. İclasın gündəliyinə daxil edilən məsələlər azaldılaraq 29-dan 20-yə endirilib. Gündəliyə İnam Kərimovun Azərbaycan Ali Məhkəməsinin hakimi təyin edilməsi haqqında məsələsi də əlavə edilib.

İqtisadiyyat Nazirliyi yanında Əmlak Məsələləri Dövlət Xidməti bu gün hərrac keçirəcək. Hərracda 10 obyekt satışa çıxarılacaq. Özəlləşdirilməyə çıxarılan dövlət əmlakları arasında yardımçı təsərrüfat, hamam, iaşə obyektləri, mağaza və digər obyektlər var.

Baş Prokurorluq tərəfindən bu gün Zaqatalada qurumun mərkəzi aparatı və ətraf region prokurorluqlarının məsul əməkdaşlarının, hüquq-mühafizə orqanları və digər dövlət qurumlarının, təhsil müəssisələrinin nümayəndələrinin iştirakı ilə geniş konfrans təşkil ediləcək. Yüksək səviyyəli konfransda regional media nümayəndələri ilə yanaşı, qeyri-hökumət təşkilatları və vətəndaş cəmiyyəti institutlarının nümayəndələri də iştirak edəcək.

Bu gün Şamaxı, Xızı və Qobustan rayonlarının qaz təchizatında fasilə yaranacaq. Bu barədə Azərbaycan Dövlət Neft Şirkətinin (SOCAR) “Azəriqaz” İstehsalat Birliyindən məlumat verilib.

Bu gün Bakı Ekspo Mərkəzində 19-cu Azərbaycan Beynəlxalq Turizm və Səyahətlər “AITF 2023” sərgisi keçiriləcək. Sərgi aprelin 6-dək davam edəcək. Sərgi müxtəlif ölkələrdən turizm sənayesinin, milli və regional turizm təşkilatlarının və dövlət qurumlarının nümayəndələrini bir araya gətirir.

Bu gündən şagird sayı 500-dək olan məktəblərə direktorların işə qəbul prosesinə başlanılacaq. Elm və Təhsil Nazirliyindən bildirilib ki, sənəd qəbulu prosesi 11 aprel tarixinədək davam edəcək.

Bu gün ölkənin bir sıra magistral yollarında görünüş məsafəsi məhdudlaşacaq. Ölkə ərazisində dumanlı hava şəraiti ilə əlaqədar olaraq gecə və səhər bəzi magistral avtomobil yollarında görünüş məsafəsinin 300-800 m-dək məhdudlaşacağı gözlənilir.

ABŞ-nin keçmiş prezidenti Donald Tramp bu gün məhkəmə qarşısına çıxarılacaq. O, pornoaktrisa Stormi Danielsə aralarındakı münasibəti gizlətməsi üçün pul vermək də daxil, 20-yə yaxın məsələdə ittiham olunur. 

Bu gün Finlandiya NATO-nun üzvü olacaq. Alyansın xarici işlər nazirlərinin görüşündə bütün detallar razılaşdırılıb.