Bu gündən bütün xarici ölkə vətəndaşlarının hava nəqliyyatı vasitəsilə Azərbaycan ərazisinə giriş-çıxışına icazə veriləcək.
Milli Məclisin Beynəlxalq münasibətlər və Parlamentlərarası əlaqələr komitəsinin sədri Səməd Seyidov, Azərbaycan-İsrail parlamentlərarası əlaqələr üzrə işçi qrupunun rəhbəri Anatoliy Rafailov və qrupun üzvləri bu gün İsrailin Tel-Əviv şəhərinə səfər edəcəklər. Səfər çərçivəsində Milli Məclisin deputatları İsraildə Azərbaycan Respublikasının səfirliyinin açılması mərasimində iştirak edəcəklər.
Bu gün Bakıda yeniyetmə boksçular arasında Ümummilli Lider Heydər Əliyevin 100 illiyinə həsr olunan beynəlxalq turnir start götürəcək. Boks Mərkəzində baş tutacaq yarış 5 gün davam edəcək.
AMEA-nın A.Bakıxanov adına Tarix İnstitutunda keçirilən “Açıq qapı” günləri bu gün də davam edir. İnstituta təkliflə müraciət etmək istəyənlər, iş axtaranlar, yaxud da institutla tanış olmaq istəyənlər bu gün də bu fürsətdən yararlana bilərlər.
Azərbaycanlı FİFA referisi Elçin Məsiyev bu gün 19 yaşadək futbolçulardan ibarət milli komandaların Avropa çempionatının elit-raundunda keçiriləcək Latviya - İsrail oyununu idarə edəcək.
Beynəlxalq Olimpiya Komitəsinin (BOK) İcraiyyə Komitəsi bu gün Rusiya və Belarusdan olan idmançıların beynəlxalq turnirlərdə iştirakı ilə bağlı məsələyə baxacaq.
Fransa həmkarlar ittifaqları pensiya islahatlarına qarşı ümummilli etiraz nümayişinə çağırış edib. Kütləvi tətilin məhz bu gündən başlayacağı gözlənilir.
Bu gün Türkiyədə prezidentliyə namizədlərin ilkin rəsmi siyahısı açıqlanacaq.
Avropa İttifaqı (Aİ) Şurasının Prezidenti Şarl Mişel bu gün Moldovaya səfər edəcək və burada yüksək səviyyəli görüşlər keçirəcək.
