Bu gün nələr gözlənilir? 

İqtisadiyyat.az xəbər verir ki, bu gün səhər saat 6:00-dan martın 25-i gecə saat 24:00-dək Bakı şəhəri, Nəsimi rayonu Alı Mustafayev küçəsində (“3-cü mikrorayon” dairəsi) yerləşən yol ötürücüsündə aparılacaq təmir işləri ilə əlaqədar olaraq Ziya Bünyadov prospektindən “20 Yanvar” dairəsi istiqamətində (yalnız yol ötürücüsü üzərində) avtonəqliyyat vasitələrinin hərəkəti məhdudlaşdırılacaq. Qeyd olunan müddət ərzində sürücülər Ziya Bünyadov prospektindən “20 Yanvar” dairəsi istiqamətində köməkçi yoldan istifadə edərək hərəkətlərinə davam edə bilərlər.

Paytaxt teatrlarının bölgələrdəki nümayişləri davam edir. Bu gün Azərbaycan Dövlət Pantomim Teatrı Qəbələ rayon Mədəniyyət Mərkəzində “Pantomim buketi”ni nümayiş etdirəcək.

Bu gün saat 15:00-da Rəqəmsal İnkişaf və Nəqliyyat Nazirliyinin tabeliyində olan Azərbaycan Yerüstü Nəqliyyat Agentliyinin (AYNA) işğaldan azad olunmuş ərazilərə təşkil etdiyi müntəzəm avtobus reyslərinə aprel ayı üçün biletlər satışa çıxarılacaq. Bilet satışı www.yolumuzqarabaga.az portalı üzərindən onlayn qaydada həyata keçirilir.

Azərbaycanlı futbol hakimi Əliyar Ağayev bu gün AÇ-2024-ün seçmə mərhələsində Bolqarıstanla Monteneqro arasında keçiriləcək qarşılaşmanı idarə edəcək. Ona Zeynal Zeynalov və Akif Əmirəli kömək edəcəklər. Qarşılaşmanın dördüncü hakimi isə Kamal Umudlu olacaq.

Futbol üzrə Azərbaycan milli komandası bu gün AÇ-2024-ün seçmə mərhələsi çərçivəsində ilk matçına çıxacaq. Canni De Byazinin yetirmələri Avstriya yığmasının qonağı olacaqlar. Oyun Bakı vaxtı ilə saat 23:45-də başlayacaq.

Türkiyənin futbol millisi bu gün Ermənistana səfər edəcək. Avro-2024-ün seçmə mərhələsi çərçivəsində Ermənistan-Türkiyə oyunu martın 25-də İrəvanda baş tutacaq.