Bu gün nələr gözlənilir?

İqtisadiyyat.az xəbər verir ki, Milli Məclisin yaz sessiyası üçün növbəti plenar iclası bu gün keçiriləcək. Bu gün parlamentdə hökumətin hesabatı da dinləniləcək.

Novruz bayramı ilə əlaqədar mart ayının müavinət, təqaüd və ünvanlı dövlət sosial yardımlarının da qrafikdən əvvəl olmaqla bayram ərəfəsində, yəni bu gün tam ödənilməsi planlaşdırılır.

“Azərsu” ASC-nin sədr müavini Köçərli Həsənov bu gün Göyçay şəhərində Göyçay və Ağdaş rayonlarından olan sakinləri qəbul edəcək. Qəbul saat 10:00-dan başlayaraq şəhərdəki Heydər Əliyev Mərkəzində keçiriləcək.

Bu gün Bakının Səbail rayonunun Neftçilər prospekti, Əziz Əliyev və Zərifə Əliyeva küçələri, eləcə də İçərişəhər ərazisinin bir hissəsinə içməli suyun verilməsində məhdudiyyət olacaq. Bu barədə "Azərsu" ASC-dən məlumat verilib. Məlumata görə, buna səbəb magistral su kəmərində təmir-bərpa işlərinin aparılmasıdır.

AZAL Bakı – Moskva - Gəncə - Moskva - Bakı marşrutu üzrə ilk reysini bu gün həyata keçirəcək. AZAL bu istiqamətdə həftədə üç dəfə – bazar ertəsi, cümə və şənbə günləri uçacaq.

Azərbaycandan həcc ziyarətinə getmək istəyənlər üçün sənəd qəbulu bu gündən başlanacaq. Ziyarət isə iyun ayının sonu, iyul ayının əvvəllərinə təsadüf edəcək. Builki ziyarət azərbaycanlı zəvvarlar üçün vahid formada təşkil olunacaq və təyyarə reysləri vasitəsilə həyata keçiriləcək.

Bu gün UEFA Çempionlar Liqasında, UEFA Avropa Liqasında və Konfrans liqasında 1/4 finala yüksələn klubların püşkatma mərasimi keçiriləcək. Mərasim saat 15:00-da baş tutacaq.