Bu gün nələr gözlənilir?

İqtisadiyyat.az xəbər verir ki, Dövlət Sosial Müdafiə Fondu (DSMF) tərəfindən ölkənin digər bölgələri üzrə mart ayının pensiyalarının, həmçinin qulluq stajına görə əlavələr alan pensiyaçıların pensiyalarının bu gün ödənilməsi nəzərdə tutulur. Novruz bayramı ilə əlaqədar mart ayının müavinət, təqaüd və ünvanlı dövlət sosial yardımlarının da qrafikdən əvvəl olmaqla bayram ərəfəsində, yəni martın 17-də tam ödənilməsi planlaşdırılır.

Baş prokuror Kamran Əliyev bu gün saat 10:00-da İsmayıllı rayon prokurorluğunun inzibati binasında İsmayıllı, Qobustan, Şamaxı, Qəbələ və Oğuz rayon sakinlərinin qəbulunu keçirəcək. Vətəndaşların qəbulla bağlı qeydiyyatı və İsmayıllı rayonuna gəlmələrinin təşkili rayon prokurorları tərəfindən həyata keçiriləcək.

Bu gün saat 15:00-da "Facebook" və "Instagram" sosial şəbəkə platformaları üzərindən “Azəriqaz” rəhbərliyinin növbəti canlı yayımı planlaşdırılır. Siz qaz təsərrüfatına dair istənilən sualla canlı yayımda müraciətlərinizi edə bilərsiniz.

Milli Məclisin deputatı, Avropa Şurasının Parlament Assambleyasında Azərbaycan nümayəndə heyətinin üzvü Sevinc Fətəliyeva AŞPA çərçivəsində keçiriləcək tədbirlərdə iştirak etmək üçün bu gün Mərakeş Krallığının Mərakeş şəhərinə səfər edəcək. 

Rumıniyanın paytaxtı Buxarestdə güləş üzrə U-23 Avropa çempionatı davam edir. Bu gün qadın güləşçilər - Ş.Nəzərova, E.Məmmədova və N.Mirzəzadə mübarizəyə start verəcək. Digər qadın güləşçilərimiz isə növbəti gün xalçaya çıxacaqlar.

Azərbaycan Dövlət Akademik Filarmoniyasında bu gün Ümummilli lider Heydər Əliyevin 100 illiyinə həsr olunmuş konsert proqramı keçiriləcək. Konsert Q.Qarayev adına Azərbaycan Dövlət Kamera Orkestrinin ifasında baş tutacaq.

Bu gündən Neftçilər prospekti və Akademik Zərifə Əliyeva küçəsindən nəqliyyat vasitələrinin hərəkəti bərpa olunacaq. Sabah səhər saatlarından isə yollar tam istifadəyə veriləcək. Qeyd edək ki, Neftçilər prospekti və Akademik Zərifə Əliyeva küçəsində üç gündür təmir işləri aparılır. Bununla bağlı həmin yollarda avtomobillərin hərəkəti dayandırılıb. Bu gündən marşrut avtobusları da ənənəvi xətlə hərəkət edəcək.

Çin bu gündən əcnəbilər üçün bütün növ vizaların verilməsini bərpa edəcək. 

Rusiya prezidenti Vladimir Putin bu gün Suriya prezidenti Bəşər Əsədlə görüşəcək.