Bu gün nələr gözlənilir?

İqtisadiyyat.az xəbər verir ki, Azərbaycan prezidenti İlham Əliyev bu gün Berlində Almaniya prezidenti Frank-Valter Ştaynmayer və kansler Olaf Şolts ilə görüşəcək. Görüşlərdə ikitərəfli münasibətlər və regional məsələlər müzakirə olunacaq. 

“Tərtər işi” ilə bağlı ittiham olunan 4 nəfər - Vüsal Ələsgərov, Rəşid Niftəliyev, Ramil Qarayev və Rüstəm Ələsgərovun cinayət işi üzrə məhkəmə araşdırması başlayır. Cinayət işi üzrə hazırlıq iclası bu gün keçiriləcək. 

Bu gün Heydər Əliyev Mərkəzində bəhreynli rəssam Raşid Al-Xəlifənin “İlk qığılcım” (First light) adlı sərgisi açılacaq. Sərgidə rəssamın ən son instalyasiyaları nümayiş etdiriləcək. Müəllifin “Balıq tələsi”, “Mozaika”, “Biz canlı olan hər şeyi sudan yaratdıq”, “Dairəvi əksetmə” kimi əsərləri ilk dəfə Heydər Əliyev Mərkəzində təqdim ediləcək.

Bu gün Azərbaycanda sonuncu - Torpaq çərşənbəsi qeyd olunur. Novruz bayramı axşamı isə martın 20-nə təsadüf edəcək. Xatırladaq ki, bu il üçün yaz fəslinin Azərbaycana gəlişi martın 21-i Bakı vaxtı ilə saat 01:24:24-ə təsadüf edəcək.

Bu gün Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Şimal-qərb küləyinin güclənəcəyi gözlənilir. Havanın temperaturu gecə 6-8° isti, gündüz 11°-dək isti olacaq. Atmosfer təzyiqi 763 mm civə sütunundan 768 mm civə sütununa yüksələcək. Nisbi rütubət 60-70 % olacaq. Rayonlarda əsasən yağmursuz hava müşahidə olunacaq. Lakin gündüz bəzi şərq rayonlarında az yağış yağacağı ehtimalı var. Bəzi yerlərdə arabir duman olacaq. Qərb küləyi ayrı-ayrı yerlərdə arabir güclənəcək.

Bu gün Monteneqronun Budva şəhərində gənc oğlan və qız boksçular arasında beynəlxalq turnir start götürəcək. Azərbaycan Boks Federasiyasının yaydığı məlumata görə, 5 gün davam edəcək yarışda yığmamız 14 idmançı ilə təmsil olunacaq.

Bu gecə UEFA Çempionlar Liqasında 1/8 final mərhələsinin növbəti oyunları keçiriləcək. Portu İnteri, Mançester Siti isə Leypsiqi qəbul edəcək. Hər iki qarşılaşma gecə saat 12-də başlayacaq.