Bu gün nələr gözlənilir?

İqtisadiyyat.az xəbər verir ki, Azərbaycana rəsmi səfərə gələn Latviya Prezidenti Eqils Levits bu gün Bakıda bir sıra ikitərəfli görüşlər keçirəcək. Üstəlik, E.Levitsin martın 9-dan 11-dək Bakıda keçiriləcək Qlobal Bakı Forumunda iştirakı da nəzərdə tutulub.

Bu gün Beynəlxalq Qadınlar Günü ilə əlaqədar “ASAN xidmət” və "ASAN kommunal" mərkəzlərində qeyri-iş günü olacaq. Martın 9-dan etibarən vətəndaşlar mərkəzlərə müraciət etməklə müvafiq xidmətlərdən yararlana bilərlər.

Bu gün paytaxtda Beynəlxalq Qadınlar Günü münasibətilə veloyürüş keçiriləcək. Yürüş saat 11:00-da “Azneft” dairəsindən start götürəcək. Marafona yalnız qadınlar qatıla biləcəklər. Tədbir Gənclər və İdman Nazirliyi və Azərbaycan Velosiped Federasiyasının təşkilatçılığı ilə baş tutacaq.

Bu gün Beynəlxalq Qadınlar Günü münasibəti ilə Yasamal rayonunda yerləşən “Zefir Mall” Ticarət Mərkəzində qadınlar üçün tədbir keçiriləcək. Tədbirdə müsabiqələr və dj-in iştirakı nəzərdə tutulub. Konsert proqramı saat 15:00-da başlayacaq və giriş sərbəstdir.

Bu gün Bakı metropoliteni xətlərində qatarların hərəkəti "28 May-Həzi Aslanov" istiqamətində saat 7:00-dan 21:00-a qədər 2,5 dəqiqəlik intervalla tənzimlənəcək. Yaşıl və Qırmızı xətlər "28 May" stansiyasında birləşdiyindən "İçərişəhər" və "Dərnəgül" istiqamətində qatarların hərəkət intervalı 2 dəfə çox olacaq. Bununla belə, ehtiyat qatarlar nəzərdə tutulacaq. Xətlər üzrə sərnişin axını diqqətdə saxlanılmaqla, zərurət yaranacağı təqdirdə həmin ehtiyat qatarlar xəttə buraxılacaq.

BMT Baş katibi Antoniu Quterreş bu gün Ukraynada Vladimir Zelenski ilə görüşəcək. O, Zelenski ilə Qara dəniz taxıl təşəbbüsünün bütün aspektləri üzrə davam etdirilməsi, eləcə də bölgədə cərəyan edən digər müvafiq məsələləri müzakirə edəcək. Qeyd edək ki, bu, Baş katibin son bir ildə Ukraynaya üçüncü səfəridir.

Bu gün həmçinin ÇL-də 1/8 final mərhələsinin cavab qarşılaşmaları çərçivəsində daha iki oyun baş tutacaq. Bununla da 1/4 final mərhələsinin  iki iştirakçısı da müəyyənləşəcək.

Saat 00:00 Bayern Munhen - PSJ

Saat 00:00 Tottenhem - Milan