İqtisadiyyat.az bu günə baş verməsi gözlənilən hadisələrin siyahısını təqdim edir. 

Bu gün Dövlət İmtahan Mərkəzində rəqəmsal SAT imtahanı keçiriləcək. İmtahan Dövlət İmtahan Mərkəzinin Nəsimi rayonu, Akademik Həsən Əliyev küçəsi, 299 ünvanında yerləşən inzibati binasında təşkil olunacaq.

Yaponiya bu gün Ayın səthinə ağıllı eniş aparatını (SLIM missiyası) göndərməyə hazırlaşır. Bu, Aya dəqiq eniş texnikasını nümayiş etdirmək üçün kiçik miqyaslı missiyadır. 

Dünən Dövlət Gömrük Komitəsi Tibbi Xidmət İdarəsinin Mərkəzi Hospitalının təşkilatçılığı, Tibbi Ərazi Bölmələrini İdarəetmə Birliyinin və Tərtər Rayon İcra Hakimiyyətinin dəstəyi ilə Ümummili Lider Heydər Əliyevin anadan olmasının 100 illiyi münasibətilə qazi və şəhid ailələrinin üzvləri üçün sosial tibbi aksiya keçirilib. Aksiya çərçivəsində 200-ə yaxın qazi və şəhid ailəsi üzvlərinin müayinəsi həyata keçiriləcək. Tibbi sosial aksiya bu gün Tərtər rayonunun işğaldan azad edilmiş Talış kəndində davam edəcək. 

Azərbaycan Respublikasının Mərkəzi Bankı, Azərbaycan Sığortaçılar Assosiasiyası və İcbari Sığorta Bürosunun birgə əməkdaşlığı çərçivəsində Azərbaycanda ilk dəfə Sığorta festivalı təşkil olunacaq. Festival bu gündən sentyabrın 7-dək təşkil olunacaq. Festivalın Bakı şəhərində Dənizkənarı Milli Park ərazisində başlamaqla Sumqayıt, İsmayıllı, Gəncə, Quba, Lənkəran, Mingəçevir, Gədəbəy, Şəki və Zaqatala regionlarında keçirilməsi nəzərdə tutulub. Tədbir ölkədə fəaliyyət göstərən sığorta şirkətlərinin iştirakı ilə “edutatement” formatında təşkil olunacaq. 

Azərbaycan Avtomobil Federasiyası (AAF) və “Zhara Events”in təşkilatçılığı ilə bu gün Heydər Əliyev Mərkəzinin qarşısında klassik avtomobillərin sərgisi, sabah isə yürüşü keçiriləcək. Bu gün Heydər Əliyev Mərkəzinin qarşısında təşkil olunacaq sərgidə yürüş üçün qeydiyyatdan keçmiş nəqliyyat vasitələri, eləcə də Mərkəzdə nümayiş etdirilən klass avtomobillərin bir qismi yer alacaq. 

Futzal üzrə UEFA Çempionlar Liqasında iştirak edən "Araz-Naxçıvan" bu gün qrupda son oyununu meydan sahibi “Riqa”ya qarşı keçirəcək. Görüş Bakı vaxtı ilə saat 18:00-da başlayacaq. 

İspaniyanın Valensiya şəhərində bədii gimnastika üzrə 40-cı dünya çempionatına start verilib. Paris-2024 Yay Olimpiya Oyunlarına lisenziya xarakteri daşıyan yarışda ölkəmizi fərdi gimnastlar Zöhrə Ağamirova, İlona Zeynalova, Kamila Qafarova, eləcə də qrup hərəkətləri üzrə yığma komandamızın üzvləri - Güllü Ağalarzadə, Ləman Əlimuradova, Kamilla Əliyeva, Zeynəb Hümmətova, Yelizaveta Luzan təmsil edir. Bu gün gimnastlar fərdi və qrup hərəkətləri proqramında final mərhələsində çıxışlarını davam etdirəcəklər.