İqtisadiyyat.az bu gün baş verəcək hadisələrin siyahısını təqdim edir.
Bu gün növbəti köç karvanı Bakı şəhərinin Qaradağ rayonundakı “Qobu park 3” yaşayış kompleksindən yola salınıb. Bu mərhələdə Füzuli şəhərinə daha 24 ailə - 68 nəfər köçürülüb.
Avqustun 21-23-də 2023-2024-cü tədris ili üzrə Elm və Təhsil Nazirliyi sisteminə daxil olan ümumi təhsil müəssisələrinə müəllimlərin işə qəbulu üzrə müsabiqənin müddətli müqavilə ilə vakansiya seçimi mərhələsi həyata keçiriləcək. Bu gün saat 11:00-dan etibarən start veriləcək müddətli müqavilə ilə müəllimlərin işə qəbulu proqram təminatı tətbiq olunmaqla mərkəzləşdirilmiş qaydada keçiriləcək. Vakansiya seçimi zamanı namizədlərə 4 vakant yer seçmək hüququ verilir. Namizədlər 23 avqust saat 11:00-dək şəxsi səhifələrinə daxil olmaqla vakant yer seçməli və elektron ərizələrini təsdiq etməlidirlər.
Avqustun 23-də futzal üzrə UEFA Çempionlar Liqasında mübarizəyə başlayacaq "Araz-Naxçıvan" bu gün Bakı-İstanbul-Riqa reysi ilə yola düşəcək.
Bakıda keçirilən şahmat üzrə Dünya Kubokunda rəqibləri ilə heç-heçə edən iştirakçılar bu gün tay-brekdə qarşılaşacaqlar.
ABŞ prezidenti Co Bayden həyat yoldaşı ilə birlikdə bu gün yanğınların 100-dən çox insanın həyatına son qoyduğu Havay adalarının Maui adasına səfər edəcək.
Avropa İttifaqı və Balkan ölkələrinin liderləri bu gün Yunanıstanın paytaxtı Afinada görüşəcəklər. Görüşdə Monteneqro, Ukrayna, Sloveniya, Xorvatiya, Serbiya, Yunanıstan, Bolqarıstan, Rumıniya, Albaniya, Makedoniya, Kosova, Bosniya və Hersoqavina liderləri və Avropa komissiyasının rəhbəri Ursula fon der Leyn iştirak edəcək.
Bu gündən ABŞ-Cənubi Koreya hərbi təlimləri start götürür.
