İqtisadiyyat.az bu gün baş verəcək hadisələrin siyahısını təqdim edir. 

Bu gün Dünya Fotoqrafiya və ya Dünya Foto Günüdür. Həmin təqvim 2009-cu ildə avstraliyalı fotoqraf Korske Ara tərəfindən təsis edilib. İlk dəfə 2010-cu ildə qeyd olunan bu gün insanlara özlərini ifadə etməyə imkan verən və ictimaiyyətin diqqətini çəkən fotoqrafiya sənətinin qlobal bayramıdır. Hər il avqustun 19-da dünyanın hər yerindən peşəkar və həvəskar fotoqraflar müxtəlif şəkillər çəkərək #worldphotoday həştəqi vasitəsilə izləyiciləri ilə paylaşırlar.

Bu gündən avqustun 31-dək Rusiyanın Yekaterinburq şəhərində Beynəlxalq Universitet İdman Festivalı keçiriləcək. Yekaterinburq şəhərinin 300 illik yubileyinə həsr olunan yarışda boks üzrə Azərbaycan milli komandası da mübarizə aparacaq.

Avropa çempionatında mübarizəyə başlayan qadın voleybolçulardan ibarət Azərbaycan millisi dünən Çexiya millisini 3-0 hesabı ilə məğlub edib. Millimiz qrupda ikinci oyununu bu gün meydan sahibi Almaniyaya qarşı keçirəcək. Görüş Bakı vaxtı ilə saat 22:00-da başlayacaq.

Bu gün Macarıstanda 19-cu Dünya Atletika Çempionatı başlayır. Yarışda 202 ölkədən 2100-dən çox idmançı mübarizə aparacaq.  

Bakıda keçirilən şahmat üzrə Dünya Kubokunda yarımfinala adlayan Nicat Abbasov bu gün Maqnus Karlsenlə qarşılaşacaq. 

Bu gün futbol üzrə Azərbaycan Premyer Liqasında 3-cü turun oyunları keçiriləcək. "Qəbələ" doğma meydanda "Sumqayıt"ı qəbul edəcək. "Səbail" isə "Zirə" ilə qarşılaşacaq. 

Azərbaycanlı hücumçu Mahir Emrelinin çıxış etdiyi Zaqreb “Dinamo”su Çempionlar Liqasında 3-cü təsnifat mərhələsinin cavab oyunu çərçivəsində bu gün Yunanıstan AEK-i ilə qarşılaşacaq.