İqtisadiyyat.az bu gün baş verəcək hadisələrin siyahısını təqdim edir.
Bu gün saat 14:00-da "Facebook" və "Instagram" sosial şəbəkələri üzərindən “Azəriqaz” İB rəhbərliyinin növbəti canlı yayımı planlaşdırılır.
Bu gün saat 11:00-da Biznes mühiti və beynəlxalq reytinqlər üzrə Komissiyanın İqtisadiyyat Nazirliyi yanında Dövlət Vergi Xidmətinin rəhbərlik etdiyi “Biznesə daxilolma” işçi qrupunun videokonfrans formatında iclası keçiriləcək.
Bakıda 1-4 avqust tarixlərində Özbəkistan mədəniyyəti günləri keçirilir. Tədbirin bu günkü proqramı çərçivəsində Azərbaycan Milli Kitabxanasında yaradılmış "Özbəkistan ədəbiyyatı və incəsənəti guşəsi”nin açılış mərasimi olacaq. Kitabxanada özbək ədəbiyyatının görkəmli nümayəndəsi, repressiya qurbanı Abdulla Qodirinin (1894-1938) Azərbaycan dilinə tərcümə olunmuş “Ötən günlər” (“Otgan kunlar”) romanının təqdimatı keçiriləcək. Bundan başqa, bu gün Muqimi adına Özbəkistan Dövlət Musiqili Teatrının kollektivi tərəfindən Azərbaycan Dövlət Akademik Musiqili Teatrının səhnəsində A.Qodirinin “Ötən günlər” əsəri əsasında hazırlanmış tamaşa nümayiş etdiriləcək.
"Qarabağ" bu gün Çempionlar Liqasında növbəti oyununa çıxacaq. Qurban Qurbanovun rəhbərlik etdiyi kollektiv II təsnifat mərhələsinin cavab görüşündə "Rakuv"u (Polşa) qəbul edəcək. Bakı Olimpiya Stadionunda keçiriləcək görüş saat 20:00-da başlayacaq. Qeyd edək ki, "Qarabağ" ilk oyunda rəqibinə 2:3 hesabıyla uduzub. Azərbaycan çempionu mərhələ adlamaq üçün azı iki top fərqi ilə qalib gəlməlidir.
Rusiya prezidenti Vladimir Putin bu gün Türkiyə prezidenti Rəcəb Tayyib Ərdoğanla telefonla danışacaq. Bu barədə Kremlin sözçüsü Dmitri Peskov məlumat verib.
İranda anomal istilərlə əlaqədar bu gündən ikigünlük tətil elan olunub. Bu barədə ölkə Səhiyyə Nazirliyinin təklifi əsasında Nazirlər Kabineti qərar qəbul edib.
Yer kürəsində G1-G2 səviyyəli geomaqnit qasırğası bu gün də davam edəcək. Bu barədə N.Tusi adına Şamaxı Astrofizika Rəsədxanasından məlumat verilib.
Təbiət fenomeni olan Super Ay bu gün də görünəcək. Super Ay hadisəsini Azərbaycan ərazisində saat 20:19-dan başlayaraq bütün gecə ərzində müşahidə etmək olar.
