İqtisadiyyat.az bu gün baş verəcək hadisələrin siyahısını təqdim edir. 

Pakistanın Baş naziri Şahbaz Şərif Azərbaycana rəsmi səfər edəcək. Bildirilib ki, Baş nazir 14-15 iyun tarixlərində Azərbaycanda səfərdə olacaq. O, Azərbaycan Prezidenti İlham Əliyevlə görüşəcək. Görüşdə iki ölkə arasında ticarət, enerji, investisiya sahəsində əməkdaşlıq müzakirə olunacaq. Qarşılıqlı maraq doğuran regional və qlobal məsələlər də müzakirə olunacaq.

Bu gün Milli Məclisin xüsusi iclası keçiriləcək. Xüsusi iclas Ümummilli Lider Heydər Əliyevin 100 illik yubileyi və Milli Qurtuluş Gününün 30 illiyinə həsr edilib.

Bu gün orta məktəblərdə “Son zəng” günüdür. “Son zəng” tədbiri hər bir ümumi təhsil müəssisəsinin həyətyanı sahəsində, həyətyanı sahəsi olmayan ümumi təhsil müəssisələrinin idman və ya akt zallarında təşkil olunacaq. “Son zəng” tədbirinə valideyn komitələri, valideyn-müəllim assosiasiyaları və ictimaiyyətin nümayəndələrinin dəvət olunması ümumi təhsil müəssisəsinin rəhbərlərinə tövsiyə edilib.

Elm və təhsil naziri Emin Əmrullayev Naxçıvan Muxtar Respublikasına səfər edəcək. Nazir bu gün Naxçıvan MR-də Heydər Əliyev adına məktəbin “Son zəng” tədbirində iştirak edəcək.

Respublikanın bölgələri üzrə pensiyaların ödənilməsi bu günə nəzərdə tutulub. Bu gün güzəştli şərtlərlə pensiya hüququna malik şəxslərin də pensiyaları ödəniləcək.

Almaniya kansleri Olaf Şolts bu gün Nazirlər Kabinetinin hakim koalisiyadakı ziddiyyətlərə görə təsdiqlənməsi dəfələrlə təxirə salınan milli təhlükəsizlik strategiyasını qəbul edəcəyini bildirib.

İtaliyanın sabiq baş naziri Silvio Berluskoninin dəfn mərasimi bu gün Milan Katedral kilsəsində keçiriləcək. 

Gürcüstanın Baş naziri İrakli Qaribaşvili bu gün Avropa İttifaqı (Aİ) Şurasının Prezidenti Şarl Mişellə görüşəcək. 

Bu gün Türkiyə, Finlandiya, İsveç və NATO arasında dördtərəfli sammit keçiriləcək.

Stolüstü tennisçilərimiz 13 yaşadək idmançıların Avropa çempionatında mübarizə aparacaqlar. Azərbaycan Xorvatiya sınaqlarında 4 idmançı ilə təmsil olunacaq. Azərbaycan millisi ilk olaraq komanda yarışlarında Polşa, İsveç və İslandiya seçmələri ilə eyni qrupda qüvvəsini sınayacaq. Bu gün başlayacaq Avropa çempionatına iyunun 18-də yekun vurulacaq.